Almatyda Nazarbaev dańǵyly boıynda jańa skver paıda boldy
ALMATY. KAZINFORM – Almatyda Nazarbaev dańǵylynyń batys bóliginde, Gandı kóshesiniń soltústiginde ornalasqan jańa skver resmı túrde ashyldy. Іs-sharaǵa qala ákimi Darhan Satybaldy qatysty.
Jańa skver qoǵamdyq keńistikterdi damytý baǵdarlamasynyń bir bóligi retinde júzege asyrylyp, jaıly qalalyq orta qalyptastyrýǵa baǵyttalǵan. Nysannyń jalpy aýmaǵy 4,16 gektar, onyń shamamen úsh gektary jasyl aımaqqa tıesili.
Qurylys barysynda ınjenerlik jáne kórkeıtý jumysy tolyq kólemde oryndaldy. Skver aýmaǵyna zamanaýı jaryqtandyrý jáne avtosýarý júıeleri ornatyldy, 10 myń sharshy metrden astam júrginshiler joly tóseldi. Demalys aımaqtary jasaqtalyp, 77 oryndyq jáne 52 qoqys jáshigi qoıyldy.
Kógaldandyrý jumysy aıasynda barlyǵy 425 aǵash otyrǵyzyldy (onyń ishinde 166 – qylqanjapyraqty, 259 – japyraqty túrler), sondaı-aq 590 buta egildi (351 – qylqanjapyraqty, 239 – japyraqty).
Skverdiń ereksheligi – jasandy toǵan. Qys mezgilinde ol syrǵanaq aıdyny retinde paıdalanylatyn bolady. Bul qala turǵyndary men qonaqtaryna jyl boıy belsendi demalysqa múmkindik beredi.
Mamandardyń aıtýynsha, kórkeıtýde klımattyq jaǵdaılarǵa beıimdelgen materıaldar jáne ekologııalyq sheshimder qoldanylǵan. Jańa skver qalanyń ortalyq bóligindegi jasyl jelek júıesimen úılesimdi túrde astasyp, turǵyndardyń serýendeýi men demalysyna qolaıly orynǵa aınaldy.
Qoǵamdyq keńistikterdi damytý qalalyq ortanyń sapasyn arttyryp, jasyl aımaqtardy kóbeıtýge jáne qala turǵyndary úshin belsendi demalys múmkindikterin keńeıtýge yqpal etedi.
Qoǵamdyq keńistikterdi damytý basqarmasynyń málimetinshe, Almatyda saıabaqtar, skverler jáne jasyl aımaqtar qurý jumystary júıeli túrde júrgizilip jatyr. Qalanyń barlyq aýdandarynda serýendeýge jáne demalýǵa arnalǵan jańa oryndar ashylyp jatyr.