Almatyda naýryzǵa deıin taǵy 350 «Sergek» kesheni ornatylady
ALMATY. KAZINFORM – Almatyda 1 naýryzǵa deıin qosymsha 350 «Sergek» apparattyq-baǵdarlamalyq keshenin ornatý josparlanyp otyr.
Qalalyq tsıfrlandyrý basqarmasy basshysynyń orynbasary Meıram Dúısekov jol qaýipsizdigin qamtamasyz etý aıasynda búginde qalada jol qozǵalysy erejeleriniń saqtalýyn baqylaıtyn 1 641 beınebaqylaý kesheni jumys istep turǵanyn aıtty.
– Bıylǵy 1 naýryzǵa deıin qosymsha taǵy 350 «Sergek» keshenin ornatý josparlanǵan, - dedi ol Óńirlik kommýnıkatsııalar qyzmetindegi brıfıngide.
Onyń sózinshe, Almatyda jasandy ıntellekt elementteri bar beınebaqylaý júıeleri, oqıǵalardy avtomatty túrde taný tehnologııalary jáne tsıfrlyq habarlaý tetikteri belsendi engizilip jatyr. Qazirgi tańda qaýipsizdik júıelerimen barlyq mektep, balabaqsha jáne densaýlyq saqtaý nysany jabdyqtalǵan.
Qalanyń biryńǵaı beınemonıtorıng júıesi aıtarlyqtaı keńeıgen. 2023 jyly shamamen 18 myń kamera jumys istese, qazir olardyń sany 65 myńǵa jetken.
2026-2027 jyldarǵa arnalǵan jospar boıynsha jeke menshik kameralardy qalanyń biryńǵaı beınemonıtorıng júıesine qosý, 2026 jyly kameralar sanyn 100 myńǵa deıin jetkizý, qosymsha beınetaldaý túrlerin engizý jáne 2026 jylǵy 1 qarashaǵa deıin «112» biryńǵaı jedel basqarý ortalyǵyn qurý josparlanyp otyr.
Aıta keteıik, Almatyda qazirgi ýaqytta 1 641 «Sergek» kesheni jumys isteıdi, onyń quramyna 9 152 beınekamera kiredi.
Sondaı-aq beınebaqylaý júıeleri 2025 jylǵy aqpan aıynan bastap kólik quraldaryn turaqqa qoıý erejelerin buzý derekterin, onyń ishinde ekinshi qatarǵa qoıý faktilerin de tirkeı bastady.
Eske salaıyq, buǵan deıin Almatyda 5 jylda «Sergek» kameralary 156 mlrd teńge aıyppul salǵanyn habarlaǵanbyz.
