Almatyda Naýryz meıramynda qaıda barýǵa bolady

ALMATY. KAZINFORM – Almatyda 14 naýryzdan bastap «Naýryznama» tujyrymdamasy aıasynda Naýryz meıramyna arnalǵan aýqymdy mádenı-kópshilik is-sharalar ótip jatyr. Bıyl qala boıynsha 200-den astam is-shara uıymdastyrylǵan.

Merekelik negizgi alańdar – Astana alańy, Abaı alańy, Jibek joly dańǵylynyń júrginshiler aımaǵy jáne Panfılov kóshesi.

Aýdandardaǵy merekelik oryndar:

Alataý aýdany – ALMATY ARENA sport kesheniniń aldyndaǵy alań (21 naýryz, 11:00-16:30)

Almaly aýdany – M. Gandı atyndaǵy saıabaq (21 naýryz, 12:00-16:00)

Áýezov aýdany – Saıran kóliniń batys jaǵalaýy (21 naýryz, 11:00-16:30)

Bostandyq aýdany – Tuńǵysh Prezıdent saıabaǵy (21–22 naýryz, 13:00-16:00)

Jetisý aýdany – Almaty ıppodromy (21 naýryz, 11:00-17:00)

Medeý aýdany – Pýshkın kóshesindegi júrginshiler alleıasy (21 naýryz, 11:00-15:00)

Túrksib aýdany – S. Seıfýllın atyndaǵy saıabaq (21 naýryz, 10:00-16:00)

Naýryzbaı aýdany – №221 mektep aýmaǵy (21 naýryz, 11:00-16:30)

Negizgi merekelik is-sharalar 21-23 naýryz aralyǵynda ótedi. Bul kúnderi qala turǵyndary men qonaqtaryna arnalǵan keń aýqymdy merekelik baǵdarlama usynylady: kontsert, teatrlandyrylǵan qoıylym, kórme, mádenıet qaıratkerlerimen kezdesý, sondaı-aq qazaq halqynyń dástúrli salt-dástúri kórsetiledi.

21 naýryz

21 naýryz qalanyń basty merekelik orny – Astana alańy kóktemgi kóńil kúıdiń, mádenıet pen erekshe emotsııanyń ortalyǵyna aınalady. Saǵat 11:00-den 22:00-ge deıin munda mýzyka, teatr, óner jáne mádenıet qaıratkerlerimen kezdesýdi toǵystyrǵan aýqymdy merekelik baǵdarlama ótedi.

Tańnan bastap qonaqtar mazmundy kontserttik baǵdarlama, kórkem teatrlandyrylǵan qoıylym men ulttyq dástúrler men zamanaýı shyǵarmashylyqtyń baılyǵyn tanytatyn taqyryptyq kórmege kýá bolady. Alań keńistigi túrli ınteraktıvti aımaqtar arqyly jandana túsedi.

Bul kúni otandyq estrada juldyzdary qatysatyn gala-kontsert bolady. Sahnada Medeý Arynbaev, Sáken Maıǵazıev, Nurjan Kermenbaev, Ernar Aıdar, Jarqynaı Hanaıym, Alen Samyqenov, Ábik Jeksen, Juldyz Ómirǵalı, Dınaıa, Saltanat Baqaeva, Móldir Áýelbekova, Áset Esjan, Ázimbek Baılın, Erden Jaqsybek, Muhtar Hanzada, Nursultan Nurberdıev, Talǵat Kúzembaev, Nurmuhammed Jaqyp, sondaı-aq «Dos-Muqasan», «Ulytaý», «KeshYOU» jáne «Alashuly» toptary óner kórsetedi.

Keshtiń sharyqtaý shegi – arnaıy qonaq retinde ázerbaıjandyq ánshi Roza Zergerlı óner kórsetedi.

Astana alańynda 6 taqyryptyq kıiz úı tigiledi:

• «Uly dala áýeni» kıiz úıi — munda Abaı, Jambyl, Dına, Aqan seri, Birjan sal syndy kórnekti tulǵalardyń mýzykalyq aspaptarynyń ekspozıtsııalary (kóshirmeleri) usynylady.

• Robo-kıiz úı — kelýshiler nazaryna pıkselder arqyly beıne jasaıtyn, qaǵaz ushaqtardy ushyratyn, týrnıkke tartylatyn robottar, sondaı-aq Dúnıejúzilik ǵarysh olımpıadasyna daıyndalǵan zymyran úlgileri tanystyrylady.

• DIGITAL 360 KÓRІNІS kıiz úıi — aınalmaly jáne edendik LED-ekrandarmen, arnaıy dybystyq effektilermen jabdyqtalǵan keńistik. Munda kelýshiler Shymbulaqtaǵy qardyń syqyryn estip, ekrannan taý betkeıinde syrǵanap júrgen snoýbordshylar men qar barysyn kóre alady. Qonaqtar Medeý men Shymbulaqtyń kórkem tabıǵatymen, saq qorǵandarymen, qalanyń úzdik meıramhanalarymen vırtýaldy túrde tanysyp, almatylyq aport — Sıvers almasynyń tarıhy týraly bile alady.

• «Saq murasy» arheologııalyq kıiz úıi — Qyrym Altynbekov negizin qalaǵan ǵylymı-restavratsııalyq zerthananyń sýretshi-restavratory daıyndaǵan ǵylymı rekonstrýktsııalar kórmesi usynylady. Ekspozıtsııa saq dáýiriniń arheologııalyq murasyna arnalǵan.

• «Dástúr kody» etno-dızaın kıiz úıi — almatylyq sheber, dástúrli «biz keste» óneriniń ókili Zeınelhan Muhamedjanulynyń týyndylary, etno-dızaıner Aıda Kaýmenovanyń toptamalary jáne Almaty mýzeıi qorynan zergerlik buıymdar qoıylady.

• «Mura» ulttyq mádenıet kıiz úıi — munda uly qazaq aqyndaryna arnalǵan teatrlandyrylǵan kórinis pen poetıkalyq qoıylym usynylady.

Merekelik kóńil kúı Abaı alańyn da qamtıdy. Munda 21 naýryz kúni saǵat 12:00-den 22:00-ge deıin qala turǵyndary men qonaqtaryna arnalǵan mazmundy ári aýqymdy baǵdarlama uıymdastyrylady.

Kúni boıy qonaqtar mádenı, oıyn-saýyq jáne sporttyq is-sharalarǵa kýá bolady. Alań merekelik rýhty sezingisi keletinderdiń basyn qosatyn ortalyqqa aınalyp, munda túrli kórmeler, festıvalder, ınteraktıv belsendilikter, sporttyq oıyndar men kópshilik serýender ótedi.

Sahnada Aıgúl Úlkenbaeva, Arkaiym toby, Il canto jáne La Bella kvartetteri, Móldir Áýelbekova, Nursultan Nurberdıev, sondaı-aq zamanaýı oryndaýshylar Kyle ruh, Nurbullin, Sábıra Sadyrqojaev, Aıbar Sanbaı, «Ágýgaı» ansambli, «Sardar» etno-ansambli, «Saq» toby, Nursad, Aikentai, AyaFUNK, Astra, Moonlight, Amalyat, «Alfa» toby jáne Ayree óner kórsetedi.

Sonymen qatar 21-23 naýryz Abaı alańynda Túrki álemi halyqtarynyń kórme-jármeńkesi ótedi. Túrkııa, Ázerbaıjan, Tájikstan, Ózbekstan, Qyrǵyzstan jáne Qazaqstannan kelgen qolóner sheberleri biregeı buıymdaryn usynady. Kórme-jármeńkede qonaqtar Ázerbaıjannyń qolmen toqylǵan kilemderi men vıtrajdyq órnekterin, Túrkııanyń áıgili keramıkasyn, Ózbekstannyń Rıshtan kógildir keramıkasyn, Tájikstannyń sıýzane jáne chakan buıymdaryn, Qyrǵyzstannyń kıizden jasalǵan shyrdaqtaryn, sondaı-aq Qazaqstannyń tekemet, basqur, quraq buıymdary men zergerlik óner týyndylaryn jáne basqa da ulttyq muralardy tamashalaı alady.

Qalanyń eń kórikti júrginshiler aımaqtarynyń biri Jibek joly – Panfılov kósheleri boıyn da merekelik kóńil kúı kerneıdi. Munda 21-23 naýryz saǵat 11:00-den 19:00-ge deıin qonaqtarǵa arnalǵan jarqyn ári serpindi baǵdarlama usynylady.

Kúni boıy bul keńistik zamanaýı jáne dástúrli óner toǵysqan erekshe alańǵa aınalady. Qala turǵyndary men qonaqtary úshin túrli mazmundy belsendilikter uıymdastyrylady.

Kelýshilerdi Robo DJ-diń erekshe shoýy, Serpin etno-folklorlyq ansambliniń oryndaýyndaǵy «NAURYZ: Qazaq Sound» kontserttik baǵdarlamasy kútedi. Kúnniń sharyqtaý shegi – áserli «Dream Light» jaryq shoýy bolmaq.

21-22 naýryz (10:00-18:00) Arbatta dástúrli «KitapFest-2026» kitap festıvali ótedi. Onda 40 baspanyń tańdaýly týyndylary usynylyp, belgili jazýshylarmen ádebı kezdesý, sondaı-aq ulttyq jáne shyǵarmashylyq baǵyttaǵy sheberdiń sabaqtary uıymdastyrylady. Festıvaldiń basty ereksheligi, tsıfrlandyrý jáne jasandy ıntellekt jyly aıasynda qurylǵan Smart Yurt kıiz úıi.

21-23 naýryz aralyǵynda Panfılov júrginshiler kóshesinde zamanaýı qazaqstandyq sýretshilerdiń keskindeme jáne fotosýret ónerin biriktirgen ashyq aspan astyndaǵy aýqymdy kórme uıymdastyrylady. Qala turǵyndary men qonaqtary belgili qazaqstandyq qylqalam sheberleriniń týyndylaryn tamashalaı alady. Bul jumystarda qazaq halqynyń dástúri men turmysy, kóshpeli mádenıet, dala beınesi men kúndelikti ómir kórinisteri kórkem ári tereń beınelengen.

Sondaı-aq osy kúnderi munda «Uly dalanyń ǵajaıyptary» atty respýblıkalyq etno-kórme ótedi. Kórmede qazaqstandyq avtorlardyń dástúr, mádenıet, tabıǵat jáne etnıkalyq murany beıneleıtin fotosýretteri usynylady. Ekspozıtsııa elimizdiń baı mádenı murasyn jetekshi fotograftardyń obektıvi arqyly tanyp-bilýge múmkindik beredi.

Osy alańda turǵyndar men qonaqtar úshin zamanaýı ınteraktıvti alleıa usynylady: LED-ekrandarda «Jeti qazyna» sımvoldary kórsetilip, Naýryz merekesiniń baǵdarlamasy tanystyrylady jáne qaladaǵy negizgi lokatsııalar boıynsha navıgatsııa qamtamasyz etiledi. Sonymen qatar «Almaty AI – Bolashaqqa saıahat» atty LED-týnnel jumys isteıdi. Bul Almaty qalasyn jasandy ıntellekt kózqarasymen tanytatyn biregeı keńistik. Budan bólek, ashyq aspan astynda «Halyqtyq karaoke» formatyndaǵy 4 karaoke alańy uıymdastyrylady.

22 naýryz

22 naýryz saǵat 11:00-den 22:00-ge deıin Astana alańynda aýqymdy merekelik baǵdarlama uıymdastyrylady. Baǵdarlama aıasynda kontserttik qoıylym, kópshilik serýen, kórme jáne ózge de mádenı is-sharalar ótedi.

Kontserttik baǵdarlamada Álisher Kárimov, Marsel, Turar, Belluci, Nurjan Abaı, Ajar Nazar, Іlııas Qabdyraı, Ray, Baha, Sanzhar Jumasitov, Astra, Zhenis, Jasulan Kópbergen jáne basqa da óner juldyzdary sahna tórinen kórinedi.

Sol kúni saǵat 11:00-den 21:30-ǵa deıin Abaı alańynda da keń aýqymdy merekelik baǵdarlama usynylady. Munda kontsert, halyqtyq serýen men kórme uıymdastyrylady.

Abaı alańynda «Dos-Muqasan» toby, Álisher Qonysbaev, Baljan Bıdash, Aıqyn, Tólepbergen, Álı Oqapov, Nurjan Kermenbaev, «KeshYOU» toby, Ademi, Axallek jáne ózge de oryndaýshylar óner kórsetedi.

Jibek joly – Panfılov júrginshiler aımaǵynda saǵat 12:30-dan 19:00-ge deıin «Jeldirme» dástúrli mýzyka kontserti, qýyrshaq teatrynyń qoıylymdary, Robo DJ shoýy jáne «Dream Light» jaryq shoýy uıymdastyrylady.

23 naýryz

23 naýryz Astana alańynda merekelik baǵdarlama saǵat 11:00-den 18:00-ge deıin jalǵasady. Sahnada Dıdar Káden, Saıa Mahambet, Dáýit Turǵynáli, Balaýsa Erǵalına, Aıdar Abdrahmanov, Jaqyp Nurmuhammed, Maıdan Aımaýyt, Bostan Nurdáýlet, Turdaly Dastan jáne kópjanrly «Parasat» etno-ansambli óner kórsetedi.

Abaı alańynda saǵat 11:00-den 21:30-ǵa deıin aýqymdy merekelik baǵdarlama uıymdastyrylady. Baǵdarlama aıasynda kontsert, kópshilik serýen, kórme jáne basqa da mádenı is-sharalar ótedi.

Kontsertte Roza Rymbaeva, Aıdana Medenova, Jubanysh Jeksenuly, Dakelot, Sanzhar, 404 toby, «Dervıshı» ansambli, «Dýdaraı» toby, Tilek Bazarov, Rano, Botagóz Ǵazızqyzy, «Tumar» toby, «Jumyr qylysh» toby, Ersultan Stamǵazıev, Bolat Qusaıynov, Alýa Erbolatqyzy jáne ózge de artıster óner kórsetedi.

Jibek joly – Panfılov júrginshiler aımaǵynda saǵat 12:00-den 19:00-ge deıin túrli is-sharalar uıymdastyrylady: qýyrshaq teatrynyń qoıylymdary, Robo DJ shoýy jáne «Dream Light» jaryq shoýy ótedi.

Sonymen qatar 21-25 naýryz aralyǵynda «Alataý» dástúrli óner teatry aýmaǵynda (Nurkent shaǵynaýdany, 6) kóshpeli shapıto formatyndaǵy «Naýryz shoý» tsırktik baǵdarlamasy ótedi.

Baǵdarlamaǵa Reseı, Ýkraına jáne Qazaqstannan kelgen úzdik artıster qatysady: gımnastar, akrobattar, úıretilgen ıtter, ekvılıbrıster men áýe gımnastary óner kórsetedi. Sondaı-aq tsırktik qoıylymǵa Murat Mutyrǵanov qatysady.

21-23 naýryz aralyǵynda Almaty qalasy mýzeıler birlestigi men Qazaqstan Respýblıkasynyń Ulttyq ortalyq mýzeıi metropolıten beketterinde fotokórme uıymdastyrady. Naýryz meıramyn merekeleý aıasynda jolaýshylarǵa qazaq halqynyń dástúri men mádenıetin beıneleıtin fotosýretter usynylady.

Jerasty kóliginiń jolaýshylary fotokórme arqyly Qazaqstannyń tarıhy men ulttyq murasymen jaqynyraq tanysa alady.

Fotokórme «Jibek Joly», «Almaly», «Saıran», «Saryarqa» beketterinde saǵat 09:00-den 21:00-ge deıin jumys isteıdi.

Eske salaıyq, buǵan deıin Almatyda Naýryznama baǵdarlamasyna engizilgen is-sharalar týraly jazǵanbyz.