Almatyda Naýryz qalaı toılanyp jatyr
ALMATY. KAZINFORM — Almatynyń 8 aýdanynda jáne Abaı alańy men Astana alańynda merekelik is-sharalar uıymdastyryldy.
Almaty qalasynda Naýryz meıramy erekshe sán-saltanatpen toılanyp jatyr.
Tań sáriden beri qala turǵyndary men qonaqtary kıiz úıler tigilip, úlken sahnada ornatylǵan Astana alańyna kóktem merekesin toılap júr. Bul alańdaǵy saltanatty sharaǵa Almaty ákimi Erbolat Dosaev, Qazaqstannyń Eńbek Eri, halyq artısi Asanáli Áshimov, Halyq qaharmany Sát Toqpaqbaev, Qazaqstannyń Eńbek Eri Aıagúl Mırazova, Qazaqstan Jazýshylar odaǵynyń tóraǵasy Mereke Qulkenov jáne kóptegen zııaly qaýym ókilderi qatysty.
Kórermenderge «Almaty — Naýryz qushaǵynda» atty aýqymdy kontsert usynyldy. Onda ańyzǵa aınalǵan óner juldyzdary: «Dos-Muqasan» ansambli, Maıra Muhamedqyzy, Janar Aıjanova, Ómirqul Aınııazov, «Sazgen sazy» folklorlyq-etnografııalyq ansambli, Jazıra Baıyrbekova, Igor Blagorodnyı, Tólegen Rahymbaev, «KeshYOU» toby, Dınaıa, AyaFunk jáne basqa da tanymal ónerpazdar óner kórsetti.
Endi saǵat 18:00–de osy alańda tanymal ánshiler qatysatyn Juldyzdy Almaty keshki festıvali ótedi.
Odan bólek Abaı alańynda mádenı mura men zamanaýı tehnologııany biriktiretin NauryzFest festıvali uıymdastyryldy. Respýblıka saraıynyń aldynda erekshe bezendirilgen kıiz úıler tigilip, altybaqan ornatyldy. Qazir munda merekelik kontsertten birge ulttyq oıyndar men túrli jarystar ótip jatyr.
Sonymen qatar Almaty metrosynyń ár beketinde qazaq halqynyń mádenıetin dáripteıtin kórmeler ashyldy. «Baıqońyr» beketinde «Sazgen Sazy» ansambli ulttyq aspaptardyń únimen mýzykalyq shoý kórsetti.
Al Almaty halyqaralyq áýejaıynda Naýryz merekesine oraı erekshe «Tátti káde-syı syılyqqa» aktsııasy uıymdastyryldy. Aktsııanyń negizgi maqsaty — qalaǵa kelgen sheteldik týrısterge merekelik kóńil-kúı syılaý jáne qazaq halqynyń qonaqjaılyǵyn kórsetý.
Áýejaıdyń halyqaralyq termınalyna kelip qonǵan týrısterge ulttyq oıý-órnektermen bezendirilgen jáne kóktemniń sımvoldarymen naqyshtalǵan tátti káde-syı berilip jatyr. Osy shara aıasynda Almatyǵa kelgen shamamen 10 myńǵa jýyq sheteldik jolaýshyǵa syı-qurmet kórsetiledi. Oǵan qosa áýejaıda arnaıy fotozona uıymdastyrylyp, ulttyq naqyshtaǵy bannerlermen bezendirildi.
Eske salaıyq, buǵan deıin baǵzy zamanda Naýryz merekesiniń qalaı toılanǵanyn jazǵanbyz.