Almatyda Naýryz qalaı toılanady
ALMATY. KAZINFORM – Almatyda Naýryz meıramy keń kólemde toılanady.
Ashyq aspan astyndaǵy aýqymdy kontsertter, sporttyq jarystar, jármeńkeler men túrli is-sharalar «Kóktóbe» saıabaǵynda, Abaı alańynda, Panfılov jaıaý júrginshiler kóshesinde, Arbatta jáne Astana alańynda ótedi. Sonymen qatar merekelik is-sharalar shahardyń barlyq aýdanynda uıymdastyrylmaq. Jalpy Almatyda naýryznama aıasynda 100-den astam is-shara ótedi.
21 naýryz kúni saǵat 11:00-de Astana alańynda «Almaty – Naýryz qushaǵynda» atty negizgi saltanatty kontsert ótedi. Sahnada áıgili «Dos-Muqasan» ansambli, Maıra Muhamedqyzy, Janar Aıjanova, Ómirqul Aınııazov, Jazıra Baıyrbekova, Igor Blagorodnyı, Tólegen Rahymbaev, «KeshYou» toby, Dınaıa, AyaFunk jáne basqa da ártistep óner kórsetedi.
«Alataý» dástúrli óner teatrynyń jáne «Jańa ǵasyr» teatrynyń ártisteri, «Almaty áýenderiniń» solısteri, «Sazgen sazy» folklorly-etnografııalyq ansambli de kontserttik baǵdarlama usynady. Sonymen qatar 21-22 naýryz kúnderi saǵat 18:00-de osy alańda tanymal ánshiler qatysatyn eki kúndik Juldyzdy Almaty keshki festıvali ótedi.
Odan bólek 21-25 naýryz kúnderi saǵat 10:00-den 16:00-ge deıin Abaı alańynda mádenı mura men zamanaýı tehnologııany biriktiretin NauryzFest festıvali ótedi.
Respýblıka saraıynyń aldynda erekshe bezendirilgen kıiz úıler tigiledi.
«Rýhanı mura» kıiz úıinde Abaı, Jambyl jáne Dına oınaǵanmýzykalyq aspaptardyń kóshirmesi qoıylyp, kontsert ótedi. «Almatyǵa saıahat» kıiz úıinde qonaqtar qalanyń kórikti jerlerin vırtýaldy formatta tamashalaı alady. Sondaı-aq sheber Marat Beksultanovtyń qolynan shyqqan nebári 20 mınýt ishinde qurastyrýǵa bolatyn «Innovatsııalyq kıiz úı» ornatylady.
Abaı alańynda altybaqan ornatylady, ulttyq oıyndar men túrli jarystar ótkizedi. Sondaı-aq Abaı Qunanbaıulynyń 180 jyldyǵyna arnalǵan art-nysandar da boı kóteredi.
21-22 naýryz kúnderi keshki ýaqytta alańda belgili ánshiler kontsert qoıady.
Festıval aıasynda birneshe kún boıy aýqymdy qolóner jármeńkesi jumys isteıdi.
Eske salaıyq, buǵan deıin Almatyda Naýryz merekesine baılanysty birneshe kóshe ýaqytsha jabylatynyn jazǵanbyz.