Almatyda «Naýryz» baǵdarlamasyna 4 myńǵa jýyq ótinish qabyldandy
ALMATY. KAZINFORM – Jańa turǵyn úı baǵdarlamasyna qatysýǵa nıet bildirgen qazaqstandyqtar arasynda 35 jasqa deıingi qazaqstandyqtar kósh bastap tur. Bul týraly Óńirlik kommýnıkatsııalar qyzmetinde ótken brıfıngide Almatydaǵy «Otbasy banki» AQ dırektory Danagúl Túsipova málimdedi.
Onyń aıtýynsha, «Naýryz» baǵdarlamasy boıynsha ótinimder jumys kúnderi saǵat 9.00-den 21.00-ge deıin qabyldanady. Baspana market platformasy (otbasybank.kz) saǵatyna orta eseppen 400 ótinimdi qabyldaýǵa qabiletti.
15 mamyrdaǵy jaǵdaı boıynsha barlyǵy 14 000 jýyq ótinim sátti qabyldansa, onyń ishinde 3 737 ótinim Almaty qalasynan bolǵan. Ótinimderdiń jartysy turǵyn úıge kezekte turǵan halyqtyń áleýmettik osal toptarynyń ókilderinen túsken.
Al 2 851 ótinim qabyldanbaı, keri qaıtarylǵan. Negizgi sebep – depozıt shotynda 1 mln teńge mólsherindegi qajetti somanyń bolmaýy. Bul «Naýryz» baǵdarlamasyna qatysýdyń negizgi sharttarynyń biri. Sondaı-aq turǵyn úıi bar adamdardyń da ótinimderi qabyldanbady.
«Jýyrda ǵana «Otaý» baǵdarlamasyna qatysýshylardyń pýlyna kirgen 8 000 qazaqstandyqtyń esimderi belgili boldy. Qazir biz olardan tólem qabilettiligin rastaý týraly ótinimderin qabyldap jatyrmyz. Eki kúnniń ishinde banktiń 500-ge jýyq klıenti nesıege maquldaý aldy. Kelesi kezeń – baspana tańdaý. Osyndaı tásildi biz «Naýryz» baǵdarlamasyna da qoldanamyz. Qazir «Otaý» baǵdarlamasynan ótpegender «Naýryz» baǵdarlamasyna qatysýǵa ótinim bere alady. Onda múmkindik kóbirek bolmaq, sebebi biz 12 000 zaem berýdi josparlap otyrmyz», - dedi «Otbasy bank» AQ Almaty q. fılıalynyń dırektory Danagúl Túsipova.
Qatysýshylardy dúrliktirmeý úshin ótinimderdi qabyldaý merzimi barynsha uzartyldy. Úmitkerlerdiń maýsym aıynyń sońyna deıin bir jarym aı ýaqyty bar. Sondaı-aq ótinim berý kúni men ýaqyty upaı sanaǵanda eskerilmeıtin bolady.
Ótinimderdi qabyldaý merzimi aıaqtalǵannan keıin saralaý bastalady. Baǵdarlamaǵa qatysýshylar tizimine eń kóp upaı jınaǵan úmitkerler kiretin bolady.
ÓKQ spıkeri upaılardyń qalaı esepteletindigine toqtalyp ótti:
- salym boıynsha syıaqy mólsheri - árbir 1 000 teńge úshin 1 upaı;
- tirkelgen nekeniń bolýy - 5 upaı;
- balalardyń bolýy - 10 upaı (balalar sanyna qaramastan);
- halyqtyń áleýmettik osal toptary (HÁOT) mártebesiniń bolýy - 10 upaı;
- 35 jasqa deıingi jas (qosa alǵanda) – 5 upaı.
Eger eki qatysýshynyń upaılar sany sáıkes kelse, onda tizimge engizý kezinde basymdyq salym somasy kóp jáne jınaqtaý merzimi uzaǵyraq adamǵa beriledi.
Saralaýdan keıin klıentter bank saıtynda «Naýryz» baǵdarlamasy boıynsha ótinish berýshilerdiń, atap aıtqanda qatysýshylar pýlyna engenderdiń jáne upaılar boıynsha ótpegenderdiń tolyq tizimin kóre alady. Sodan keıin qatysýshylardyń nesıege ótinim berýge ýaqyttary bolady.
Zaem boıynsha oń maquldaý alǵan úmitkerdiń 2024 jyldyq jeltoqsan aıynyń ortasyna deıin baspana izdep, satyp alýyna ýaqyty bolady.
«Naýryz» baǵdarlamasynyń sharttary:
- alǵashqy jarna – 20%-dan bastap;
- turǵyn úı kezeginde turǵan azamattardyń áleýmettik osal sanattary úshin kredıt boıynsha mólsherleme - 7% (JTSM 7,3%-dan 8,9% deıin);
- azamattardyń barlyq sanattary úshin kredıt boıynsha mólsherleme – 9% (JTSM 9,3%-dan 11,8% deıin);
- nesıe merzimi – 19 jylǵa deıin.
«Zaemnyń Almaty men Astana qalalary úshin eń joǵarǵy mólsheri – 36 mln teńgege, al qalǵan óńirler úshin – 30 mln teńgege deıin», - dedi Danagúl Túsipova.
Sonymen qatar bir nesıe aıasynda satyp alynyp jatqan bastapqy baspanany jóndeý jumystaryna da aqsha alýǵa da bolady. Bastysy jóndeýge arnalǵan qaryz somasy turǵyn úı satyp alýǵa arnalǵan kredıttiń jalpy somasynyń 20%-nan aspaýy tıis.
Baǵdarlamaǵa qatysýshy páterdi Baspana market portalynan tańdap, brondaı alady (otbasybank.kz). Bul qyzmet jańa turǵyn úı baǵdarlamasynyń bastalýy aıasynda turǵyn úı baǵasynyń jasandy ósýine jol bermeýge arnalǵan.
