Almatyda nashaqorlardy áleýmettik ońaltýdyń jańa baǵdarlamasy engizildi

ALMATY. KAZINFORM – Almatyda esirtkige táýeldilikten ońaltýdan ótip jatqan adamdarǵa arnalǵan áleýmettik beıimdeý baǵdarlamasy iske qosyldy. Bul týraly óńirlik kommýnıkatsııalar qyzmetinde ótken baspasóz máslıhaty barysynda psıhıkalyq saýyqtyrý ortalyǵynyń narkologııalyq qyzmet jónindegi dırektorynyń orynbasary Roza Tatıeva aıtty.

Spıkerdiń sózinshe, beıimdeý baǵdarlamasy emdeýden keıingi ómirdi qalpyna keltirýge, retsıdıvti boldyrmaý jáne qoǵamǵa qaıta qosylýǵa kómektesedi.

– Kóp jaǵdaıda olar qıyndyqtarmen betpe-bet qalyp, ári qaraı qalaı áreket etý kerektigin bilmeıdi. Adamdy táýeldilikten aryltý ǵana emes, oǵan keıingi ómirge qural berý de mańyzdy. Qolóner – bul jaı ǵana jumys emes, bul tirek jáne nusqaýlyq, aıaqqa turý múmkindigi, – deıdi maman.

Jańa baǵdarlama aıasynda qatysýshylar tájirıbeli sheberler men psıhologtardyń jetekshiligimen qolóner mamandyqtaryn ıgere alady.

– Biz qolóner sabaqtary patsıentterge ómirdiń jańa maǵynasyn tabýǵa kómektesken sátti mysaldardy kórdik. Endi osy tájirıbeni júıeli túrde engizip, múmkindiginshe kóp adamǵa qoldaý kórsetýdi maqsat etýdemiz, – dep atap ótti «Narkostop» jobasynyń qoǵammen baılanys jónindegi volonteri Janna Nýrseıtova.

Almaty qalasynyń Psıhıkalyq densaýlyq ortalyǵynyń málimetine sáıkes, jyl saıyn reabılıtatsııadan 500-den 800-ge deıin patsıent ótedi.

Osyǵan deıin Almatyda esirtkige táýeldilerdiń 44 paıyzy ony qyzyǵýshylyqtan qoldanǵany týraly jazǵan edik.