Almatyda «Mýzeı túni» qalaı ótti
ALMATY. KAZINFORM – 18 mamyr – Halyqaralyq mýzeı kúni. Ataýly kúnge oraı, Almatydaǵy barlyq murajaı mýzeı túni naýqanyn ótkizdi. Solardyń birine Kazinform agenttiginiń fototilshisi baryp, merekelik sharany sýretke túsirip qaıtty.
Almaty mýzeıleri qala turǵyndary men qonaqtaryna qolónershiler jármeńkesin, sheberlik synyptaryn, kórmeler, ekskýrsııalar, dárister, mýzykalyq qoıylymdar daıyndady, bul túni murajaılarǵa kirý tegin boldy.
Kazinform agenttiginiń fototilshisi Ábilhan Qasteev atyndaǵy QR Memlekettik óner mýzeıinde boldy. Munda kórermender úshin kórmeler, kontsertter, ekskýrsııalar, sheberlik sabaqtary jáne ınteraktıvti sharalarmen mazmundy baǵdarlama usynyldy.
«Mýzeı túni» jobasynyń maqsaty – mýzeı keńistiginde mádenı murany nasıhattaý jáne keń aýdıtorııany tartý», - dep habarlady Memlekettik mýzeıdiń baspasóz qyzmeti.
2024 jyldyń mańyzdy oqıǵasy Á. Qasteev atyndaǵy mýzeı qorynan «Japon óneri» kórmesi men katalogynyń basylyp shyǵýy boldy. Osyǵan baılanysty bıylǵy joba Japon ultynyń óneri men mádenıetin zertteýge arnaldy.
«XVII-XXI ǵasyrdaǵy «Japon óneri» kórmesi uıymdastyryldy. Ekspozıtsııada 250-ge jýyq ekspanattar – grafıka, metall, aǵash, keramıka, mata, súıek, shynydan óńdelip jasalǵan týyndylar men buıymdar bar. Sonymen qatar, kórme aıasynda Dosym Sátbaevtyń jeke jınaǵynan japondyq artefaktilermen tanysýǵa múmkindik týdy. Sondaı-aq, «Japon óneri» kórmesi boıynsha tanymdyq ınteraktıvti kvest oıyndar men qazaq, orys, aǵylshyn tilderinde ekskýrsııa júrgizildi.
Kórermender nazaryna qosymsha zamanaýı avtor Kaorý Morıdiń «Qalyńdyqtyń tarıhy» (2008) serııasymen japondyq Manga ekspozıtsııasy usynyldy.
Murajaıǵa kelgen almatylyqtar kontserttik baǵdarlamany tamashalaı aldy, onda Qazaqstannyń estrada juldyzdary, mýzykalyq jáne shyǵarmashylyq ujymdar, ansamblder óner kórsetti.
«Mýzeı túni» aktsııasy Almatynyń basqa mýzeılerinde de ótti, onda árbir kelýshige ekskýrsovod-gıdter óziniń mádenı-tanymdyq baǵdarlamasyn usyndy.
«Mýzeı túni» alǵash ret 1997 jyly Berlınde ótti. Halyqaralyq mýzeıler kúnine oraılastyrylǵan aktsııanyń maqsaty – mádenı mura men ónerdi nasıhattaý.
Qazaqstanda bul aktsııa 2006 jyldan bastap uıymdastyryp keledi.
