Almatyda múmkindigi shekteýli azamattar ınvataksı qyzmetin túnde de paıdalana alady

ALMATY. KAZINFORM — Almaty qalasynda ınvataksı qyzmetin 3100 múmkindigi shekteýli azamat tutynady. Olardyń 2215-i bul kólikke jıi minedi. 

Almaty qalasy prokýratýrasynyń taldaý nátıjesi boıynsha múgedektigi bar jandar tasymaldaý qyzmetine tek kúndizgi ýaqytta qol jetkize alady. Al túngi ýaqytta qoljetimsiz.

Ýaqyttyń shekteýligi azamattar úshin keshki jáne túngi mezgilde, mysaly, medıtsınalyq mekemelerge barý, shuǵyl jaǵdaılarda nemese qoǵamdyq ómirge qatysýda aıtarlyqtaı qıyndyqtar týǵyzǵan.

Prokýratýranyń qadaǵalaý aktisi boıynsha ýákiletti organ sharttarǵa qosymsha ázirlengen kelisimderge qol qoıdy. 

— Endi «ınvataksı» qyzmetin 2 215 múmkindigi shekteýli azamat túngi ýaqytta da paıdalana alady. Qabyldanǵan sharalar nátıjesinde atalǵan qyzmetke teń qoljetimdilik qamtamasyz etildi, áleýmettik ádilettilik qalpyna keltirildi, — delingen aqparatta.

Aıta keteıik, buǵan deıin prokýratýra ShQO-da múmkindigi shekteýli azamattarǵa «ınvataksı» 3 jyl boıy qyzmet kórsetpegeni týraly jazdyq.