Almatyda Muhtar Áýezov atyndaǵy teatrdyń 100 maýsymy ashyldy
ALMATY. KAZINFORM – Respýblıka saraıynda Muhtar Áýezov atyndaǵy Qazaq ulttyq drama teatrynyń 100-shi maýsymy ashyldy.
Ulttyq teatr óziniń júz jyldyq mereıtoıyna oraı «Ǵasyrǵa basqan qadam» atty saltanatty teatrlandyrylǵan qoıylymyn usyndy. Kesh barysynda kórermen nazaryna teatr repertýaryndaǵy tańdaýly qoıylymdardan sahnalyq úzindiler kórsetildi.
Sonymen qatar kelýshilerge «Ǵasyr jasaǵan ult teatry» atty ınteraktıvti kórme usynyldy.
- Bir ǵasyr boıy teatr sahnasynan kórermen júregine jol tartqan árbir spektakl – halyqtyń úni, zamannyń tynysy. Qazaq teatrynyń ǵasyrlyq shejiresi – eldiń ótkeni men búgini, ulttyq rýh pen kórkem oıdyń tutas álemi. Bul qundy mura zamanaýı teatr ónerimen sabaqtasyp, aldaǵy ǵasyrlarǵa jalǵasyp, ulttyń mádenı jadyn baıytyp, rýhanı qazynasyn tereńdete bermek, - dep habarlady teatrdyń baspasóz qyzmeti.
Eske salaıyq, qazaqtyń tuńǵysh kásibı teatry - Muhtar Áýezov atyndaǵy Qazaq ulttyq drama teatrynyń shymyldyǵy 1926 jyly 13 qańtarda Qyzylorda qalasynda ashyldy. Bastapqy qoıylymdary Q.Kemeńgerulynyń «Altyn saqına» jáne M.Áýezovtiń «Eńlik – Kebek» pesalarynan úzindiler boldy.
1928 jyly teatr Almatyǵa kóship, jańa býyn akterlermen tolyqty. 1937 jyly 27 aqpanda akademııalyq teatr mártebesin aldy. 1961 jyly jazýshy Muhtar Áýezovtiń esimin ıelendi.
2020 jyldyń 20 jeltoqsanynda Memleket basshysy Qasym-Jomart Toqaevtyń Jarlyǵymen teatrǵa Ulttyq mártebesi berildi.
Qazirgi ýaqytta teatrdyń ǵımaratyna jóndeý jumystary júrgizilip jatyr. Ol 2026 jyly aıaqtalady.