Almatyda Muhtar Áýezov atyndaǵy kitaphana ashyldy
ALMATY. KAZINFORM — Almatyda Muhtar Áýezov atyndaǵy kitaphananyń saltanatty ashylýy rásimi ótti.
Іs-sharaǵa eldiń mádenıet pen ádebıet salasynyń kórnekti ókilderi qatysty. Sonymen qatar «Muhtar Áýezovtiń Qazaqstan mádenıeti men ádebıetiniń damýyna qosqan úlesi» taqyrybyndaǵy dóńgelek ústel uıymdastyryldy. Qatysýshylarǵa jazýshynyń nemeresi Zıfa-Álýa Áýezova beınejoldaý arqyly quttyqtaý bildirdi.
Saltanatty rásim kezinde Murat Áýezovtiń jeke muraǵatynan alynǵan kitaptar Almaty qalasynyń ortalyqtandyrylǵan kitaphana júıesine tapsyryldy. Sondaı-aq Álkeı Marǵulannyń buryn jarııalanbaǵan «Muhtar Áýezov týraly estelikter» atty kitabynyń tusaýkeseri ótti.
— Muhtar Áýezov atyndaǵy kitaphananyń ashylýy — rýhanııat salasyndaǵy mańyzdy oqıǵa. Bul oryn uly jazýshynyń murasyn ulyqtap qana qoımaı, ulttyq ádebıet pen mádenıetti jańa deńgeıge kóteretin rýhanı ortalyqqa aınalady. Muhtar Áýezovtiń murasy — halqymyzdyń rýhanı baılyǵynyń altyn tiregi. Osyndaı ortalyqtar bul baılyqty keler urpaqqa jetkizetin senimdi kópir bolmaq, — dedi Qazaqstan Jazýshylar odaǵynyń tóraǵasy Mereke Qulkenov.
Jańa mádenı nysan ishinde Muhtar Áýezov pen Murat Áýezovke arnalǵan memorıaldyq zal ashyldy. Ekspozıtsııada jazýshynyń jeke zattary, sırek kezdesetin estelik buıymdar men muraǵattyq beınematerıaldar qoıylǵan. Kitaphanaǵa kelýshiler munda uly jazýshynyń ómiri jáne shyǵarmashylyǵymen tanysa alady.
Eske salaıyq, buǵan deıin Almatyda ınteraktıvti aımaqtary bar zamanaýı balalar kitaphanasy ashylatynyn jazǵanbyz.