Almatyda múgedektigi bar adamdar úshin 34 myń nysanǵa aýdıt júrgizildi
ALMATY. KAZINFORM – Almatyda múgedektigi bar adamdar úshin qalalyq ınfraqurylymnyń qoljetimdiligine alǵash ret júıeli ári aýqymdy taldaý júrgizildi.
Jumyspen qamtý jáne áleýmettik baǵdarlamalar basqarmasynyń málimetinshe, barlyǵy 34,1 myń nysan pasporttaldy. Onyń ishinde 733 memlekettik nysan (3%), 21,3 myń jeke sektor nysany (62%), 9,4 myń kóppáterli turǵyn úı (27%) jáne 2,7 myń qoǵamdyq kólik aıaldamasy (8%) bar. Taldaý nátıjeleri 2030 jylǵa deıin nysandardyń keminde 75%-yn beıimdeýge negiz bar ekenin kórsetti.
Úderisti avtomattandyrý maqsatynda «ADO» AQ-nyń Sıtýatsııalyq ortalyǵy ázirlegen «Sandyq ınklıýzııa. Nysan pasportynyń tirkelýi» mobıldi paneli qoldanylady. Bul júıe nysandardy pasporttaý barysynyń barlyq kezeńin naqty ýaqyt rejıminde baqylaýǵa múmkindik beredi.
– Qazir qoljetimdi ortany qamtamasyz etýdiń óńirlik qaǵıdalary ázirlenip jatyr. Atalǵan qaǵıdalardy qabyldaý kedergisiz ortanyń júıeli damýyn qamtamasyz etip, tsıfrlyq quraldardy paıdalaný arqyly jobalaý-smetalyq qujattamaǵa jáne jańa nysandardy paıdalanýǵa berý úderisine baqylaýdy kúsheıtedi. Sondaı-aq, nysandardy jobalaý, salý jáne paıdalaný boıynsha biryńǵaı standart bekitedi, - delingen habarlamada.
inva.gov.kz portalyna qala boıynsha 9,9 myńnan astam nysan týraly málimet engizildi. 2025 jyldyń qorytyndysy boıynsha nysandardyń 60%-y beıimdeldi, bul josparlanǵan kórsetkishtiń 100%-yna sáıkes keledi. Al 2026 jyly shamamen 5,7 myń nysandy beıimdeý josparlanyp otyr.
Eske salaıyq, buǵan deıin Qazaqstan vokzaldarynda múgedektigi bar jolaýshylarǵa arnalǵan jańa súıemeldeý qyzmeti iske qosylǵanyn habarlaǵanbyz.