Almatyda mototsıkl qaǵyp, eki jol jumysshysy mert boldy

ALMATY. KAZINFORM - Almatyda jol-kólik oqıǵasy eki adamnyń ómirin qıdy.

Almaty qalasy Polıtsııa departamentiniń málimetinshe, jol apaty 9 sáýir saǵat 1:30 shamasynda Alataý aýdanynda bolǵan. Mototsıkl júrgizýshisi Rysqulov dańǵylymen batys baǵytta kele jatyp, aldymen jeńil kólikke soqtyǵysqan. Keıin qozǵalysy toqtamaǵan kúıde jol jumystaryn júrgizip jatqan 3 jumysshyny ( eki er, bir áıel adam) qaǵyp ketken.

- Ókinishke qaraı, eki er adam oqıǵa ornynda kóz jumdy. Al áıel aýyr halde qalalyq aýrýhanalardyń birine jetkizildi. Polıtsııanyń anyqtaý basqarmasy eki adamnyń ólimine ákep soqtyrǵan jol-kólik oqıǵasyna baılanysty qylmystyq is qozǵady, - dep habarlady departamentten.

Eske salaıyq, buǵan deıin Almaty oblysynda daýyl kezinde aǵash qulap, er adam mert bolǵanyn jazǵanbyz.