Almatyda mopedshilerdiń qatysýymen bolǵan jol apatynda 14 adam qaza tapty
ALMATY. KAZINFORM – Almatyda jyl basynan beri moped júrgizýshileri 743 ret jol-apatyna ushyraǵan. Bul týraly jol qaýipsizdigi máselesine arnalǵan qoǵamdyq keńesinde polıtsııa departamentiniń bastyǵy Arystanǵanı Zapparov málim etti.
Arystanǵanı Zapparovtyń sózinshe, qala kóshelerinde balamaly kólik, mopedter men elektrosamokattardyń qatysýymen jol-kólik oqıǵalary jıilep ketken.
Jyl basynan beri moped júrgizýshileri 743 ret jol apatyna túsken. Saldarynan 14 adam qaza tapty, taǵy 757 adam jaraqat alǵan. Al samokattardyń qatysýymen 103 jol-kólik oqıǵasy tirkelip, 109 turǵyn zardap shekti, abyroı bolǵanda, qaza bolǵandar joq.
«Moped pen samokat júrgizýshileri jınalatyn oryndarda 8 motoekıpaj turaqty túrde patrýldeý jumystaryn júrgizedi. 32 myńǵa jýyq mopedshi men 28 myńnan astam elektrosamokat paıdalanýshy ákimshilik jaýapkershilikke tartyldy. Mamandandyrylǵan aıyppul turaǵyna 1700 moped qoıyldy. Sondaı-aq, 100-den astam ata-ana balalaryna samokat pen moped júrgizýge ruqsat bergeni úshin jaýapqa tartyldy», - dedi Arystanǵanı Zapparov.
Qalalyq polıtsııa basshysynyń aıtýynsha, jyl basynan beri shahar joldarynda 3 420 483 jol erejesin buzý deregi anyqtalǵan. Onyń eki myńǵa jýyǵy kólikti mas kúıinde basqarǵan.
