Almatyda mopedshi áıel beton aralastyrǵysh kólikpen soqtyǵysyp, mert boldy

ALMATY. KAZINFORM — Almatyǵa kireberiste, Qapshaǵaı tas jolynda beton aralastyrǵysh kólik pen moped soqtyǵysty.

Jergilikti polıtsııa qyzmetiniń kezekshi bóliminiń málimetinshe, jol apaty búgin, 5 qyrkúıekte saǵat 08:50-de Almatynyń Jetisý aýdanynda bolǵan.

– HOWO markaly júk kóliginiń júrgizýshisi Qapshaǵaı tas jolymen ońtústik baǵytta kele jatyp, Honda markaly mopedpen soqtyǵysqan. Mopedti tizgindegen 54 jastaǵy áıel alǵan jaraqatynan oqıǵa ornynda kóz jumdy, – dep habarlady Almaty polıtsııasynyń baspasóz qyzmeti.

Jol apatyna qatysty qylmystyq is qozǵalyp, tıisti saraptamalar taǵaıyndaldy.

Eske salaıyq, 3 qyrkúıekte Almatyda avtobýs júrgizýshisi samokatpen joldan ótip bara jatqan eki qyzdy qaǵyp ketken edi. Saldarynan 2008 jyly týǵan eki jasóspirim jaraqat alyp, aýrýhanaǵa jetkizildi.