Almatyda moped júrgizýshisi júk kóligimen soqtyǵysyp, qaza tapty

Almatyda KamAZ moped aıdaǵan 17 jastaǵy bozbalany qaǵyp ketti, dep habarlaıdy QazAqparat tilshisi 

Almaty polıtsııa departamentiniń málimetinshe, jol apaty 4 qazan kúni saǵat 15:45 shamasynda Túrksib aýdanynda bolǵan. 33 jastaǵy KamAZ kóliginiń júrgizýshisi Krasnogorskaıa kóshesimen ońtústik baǵytta kele jatyp, ońǵa burylǵan kezde 2006 jyly týǵan A.esimdi azamattyń basqarýynda bolǵan mopedpen soqtyǵysty.

«Apat saldarynan moped júrgizýshisi A. esimdi azamat oqıǵa ornynda kóz jumdy, onyń janyndaǵy jolaýshy túrli dene jaraqatyn aldy», - dep habarlady vedomstvodan.

Atalǵan derek QR QK-niń 345-baby 3-bóligi boıynsha sotqa deıingi tergeýdiń biryńǵaı tizilimine tirkeldi. Saraptama taǵaıyndaldy.

Buǵan deıin Tımırıazev kóshesinde samokat mingen 13 jastaǵy balany júk kóligi qaǵyp, mert qylǵanyn jazǵan bolatynbyz.