Almatyda moped urlaǵan kúdikti polıtsııa qyzmetkerin jolda súırep ketti

ALMATY. KAZINFORM – Almatyda polıtsııa qyzmetkeri moped urlaǵan uryny toqtatty.

Tártip saqshysynyń is-áreketi kórsetilgen beıjazbany Almaty qalasynyń Polıtsııa departamenti jarııalady. Resmı málimetke sáıkes, kúndizgi ýaqytta polıtsııaǵa Tóle bı dańǵyly boıyndaǵy aýlada turǵan mopedtiń urlanǵany týraly habarlama kelip túsken. Mototsıkl dýlyǵasyn kıgen eki adam ońtaıly sátti paıdalanyp, urlyq jasaǵan.

Jaqyn mańdaǵy aýmaqty jedel tekserý barysynda Almaly aýdandyq polıtsııa bóliminiń jedel ýákili, polıtsııa aǵa leıtenanty Eldar Toqtashev kúdiktilerdi baıqaǵan.

- Jolda kólik kóp bolǵandyqtan, polıtsııa qyzmetkeri qylmyskerlerdi jaıaý ańdı bastady. Birneshe ret toqtaýdy talap etkenine qaramastan, kúdiktilerdiń biri qashýǵa árekettenip, nátıjesinde polıtsııa qyzmetkerin birneshe metrge súırep, basqa jol qozǵalysyna qatysýshymen soqtyǵysqan. Alǵan jaraqatyna qaramastan, polıtsııa qyzmetkeri batyldyq tanytyp, kúdiktini ustady. Keıinnen onyń qaladaǵy moped urlyǵynyń kem degende tórt epızodyna qatysy bar ekendigi belgili boldy, - dep habarlady departamentten.

Kúdiktige qatysty sotqa deıingi tergeý amaldary júrgizilip jatyr. Ol qamaýǵa alyndy.

Eske salaıyq, Shymkentte polıtsııany kóligimen qaǵyp, birneshe metrge súırep ketken júrgizýshi ustaldy.

Keıin polıtsııa qyzmetkerin kóligimen súırep ketken júrgizýshi 7 jylǵa sottaldy.