Almatyda monshalarǵa qatysty ekologııalyq talaptar kúsheıtilmek
ALMATY. KAZINFORM — Almatyda atmosferalyq aýany qorǵaýǵa baǵyttalǵan jańa ekologııalyq talaptardy engizý máselesi monsha keshenderiniń ıelerimen talqylandy. Kezdesýge qaladaǵy bıznes ókilderi, sondaı-aq sala mamandary qatysty.
Negizgi nazar — úshinshi sanattaǵy nysandarǵa qoıylatyn ekologııalyq standarttardy túsindirý jáne olardy kezeń-kezeńimen engizý joldaryna aýdaryldy.
Talqylaýda atmosferaǵa taraıtyn zııandy shyǵaryndylardy azaıtý, ekologııalyq taza otyn túrlerine kóshý, sondaı-aq súzgileý jáne tazartý júıelerin ornatý sııaqty naqty tehnıkalyq sheshimder kóterildi. Monsha ıeleri jańa talaptarǵa beıimdelý merzimi, jabdyqtardy jańartý shyǵyndary jáne memleket tarapynan qoldaý tetikteri jóninde suraqtar qoıdy.
Mamandardyń aıtýynsha, jańa ekologııalyq normalar birden emes, kezeń-kezeńimen engiziledi. Bul bızneske beıimdelýge múmkindik berip, bir mezette qaladaǵy aýa sapasyn jaqsartýǵa baǵyttalǵan.
— Biz mundaı nysandardyń jumys ereksheligin jaqsy túsinemiz jáne olardyń jańa talaptarǵa beıimdelý joldaryn birlesip izdeýge daıynbyz, — dedi Eco Almaty ókili.
Jańa talaptar 2027 jyldyń basynan bastap kúshine enýi josparlanyp otyr. Olar Almatydaǵy aýa lastanýyn azaıtýǵa jáne ekologııalyq qaýipsiz tehnologııalardy keńinen engizýge baǵyttalǵan.
Eske salaıyq, buǵan deıin Almatyda monsha jáne saýna ıelerimen profılaktıkalyq jumys kúsheıtiletinin habarlaǵanbyz.
