Almatyda monsha kesheniniń shatyry órtendi

ASTANA. KAZINFORM — Almaty qalasynyń Naýryzbaı aýdanynda, Jýaly kóshesinde ornalasqan bir qabatty monsha kesheninde órt shyqty, dep habarlaıdy vedomstvonyń baspasóz qyzmeti.

Órt 280 sharshy metr aýmaqty qamtyǵan, ıaǵnı keshenniń shatyry janǵan.

Oqıǵa ornyna jetken órt sóndirýshiler dereý sý kózine qosylyp, sýdyń úzdiksiz berilýin qamtamasyz etti. Jedel jáne úılesimdi árekettiń nátıjesinde ottyń monsha kesheniniń basqa bólikterine, sondaı-aq jaqyn mańdaǵy turǵyn úı men kafege taralýyna jol berilgen joq.

Sonymen qatar, órt sóndirýshiler janyp jatqan ǵımarattyń ishinen gaz ballonyn qaýipsiz jerge shyǵaryp úlgerdi.

— Órt tolyq sóndirildi. Zardap shekkender joq, — delingen taratylǵan aqparatta.

Budan buryn Úshqońyr taýlaryndaǵy iri tabıǵı órt sóndirilgenin jazdyq.