Almatyda Momyshuly atyndaǵy mektepte bastaýysh synyptarǵa arnalǵan jeke nysan salynady
ALMATY. KAZINFORM — Baýyrjan Momyshuly atyndaǵy № 131 mektep-lıtseıine bekitilgen jer teliminde jańa úsh qabatty ǵımarat boı kóteredi, dep habarlaıdy Almaty ákimdiginiń baspasóz qyzmeti.
Ákimdiktiń málimetinshe, mundaı sheshimdi Almaty qalasynyń ákimdigi mekteptiń shamadan tys júktelýine baılanysty ata-analar tarapynan túsken kóptegen ótinishten keıin qabyldady.
Mektep-lıtseı ornalasqan Samal shaǵynaýdanynda halyq sany ósip keledi, turǵyn úı qurylysy da qarqyndy júrip jatyr. Bul oqýshylar kóbeıeti jóninde boljam jasaýǵa negiz bolyp otyr. Osyǵan baılanysty mektep ınfraqurylymyn keńeıtý — oqýshylardyń qaýipsiz ári jaıly jaǵdaıda bilim alýyna baǵyttalǵan ýaqytyly jáne qajetti is-shara.
Jańa ǵımarat 1-den 4-synypta oqıtyn shamamen 300 balaǵa arnalmaq.
Keshe Almaty qalalyq bilim basqarmasy men Medeý aýdany ákimdigi ókilderiniń ata-analar qaýymymen ótken kezdesýinde barlyq usynys-shaǵym tyńdaldy. Negizgi ótinishtiń biri — qurylys jumystary kezinde barlyq qaýipsizdik normasynyń qatań saqtalýy.
— Qurylys jumystary sabaq ýaqytynan tys júrgiziledi jáne sanıtarlyq talaptaǵy shý deńgeıi normalary saqtalady. Bul oqý úderisine kedergi keltirmeý jáne oqýshylarǵa qolaısyzdyq týǵyzbaý úshin jasalady. Qurylys kezeńinde oqýshylar men mektep qyzmetkerleriniń qurylys aımaǵyna kirýi shekteledi, qurylys aýmaǵy tolyq oqshaýlanyp, qorshalady. Іri kólemdi tehnıka tek demalys kúnderi kirip-shyǵa alady, bul oqý kezeńinde oqýshylar men jaqyn mańdaǵy turǵyndarǵa tónetin qaýip-qaterdi barynsha azaıtady. Mektep aýmaǵyna Snegın, Meńdiqulov jáne Dostyq kósheleri jaǵynan kirýge bolady. Nysanda eskertý jáne aqparattyq belgiler, sondaı-aq qaýipsiz júrip ótý men evakýatsııa syzbalary ornatylady. Qaýipsizdik pen ótkizý rejımin saqtaýdy lıtseı ákimshiligi men kúzet qyzmeti birlesip baqylap otyrady, — delingen vedomstvo habarlamasynda.
Almaty qalasynyń bilim basqarmasy men mektep ákimshiligi balalardyń qaýipsizdigin qamtamasyz etý jáne oqý úderisin uıymdastyrý máselesin turaqty baqylaýda ustaıdy. Nysandy paıdalanýǵa berý 2026 jyly jeltoqsan aıyna josparlanǵan.
Aıta keteıik, Medeý aýdanyndaǵy oqýshy oryndarynyń tapshylyǵy saqtalyp otyr. Jalpy tapshylyq shamamen 4400 oryn. Solardyń ishindegi eń kóp júktelgen bilim berý uıymdarynyń biri — № 131 mektep-lıtseı. Mekteptiń jobalyq qýaty 940 orynǵa eseptelgenimen, búginde munda 2201 bala bilim alyp júr.