Almatyda mindetin durys atqarmaǵan 11 myń ata-ana jaýapqa tartyldy
ALMATY. KAZINFORM — Bıyl 7 aı ishinde jasóspirimder jasaǵan qylmys pen otbasylyq-turmystyq zorlyq-zombylyqtyń sany edáýir azaıǵan. Bul týraly Almaty polıtsııasy Qoǵamdyq qaýipsizdik basqarmasynyń bastyǵy Tımýr Noǵaıbaev aıttty.
Onyń aıtýynsha, jasóspirimder qylmysy 7%-ǵa, kámeletke tolmaǵandarǵa qatysty jasalǵan qylmystar 4%-ǵa tómendegen. Sonymen qatar túngi ýaqytta balalary úıden jyraqta, qaraýsyz júrgeni úshin 11 myńǵa jýyq ata-ana jaýapkershilikke tartyldy.
— Kámeletke tolmaǵandar arasynda aýyr qylmystyń aldyn alýǵa kóp kóńil bólinedi. Qylmysty ýaqytyly aýyzdyqtaý kerek, — dedi Tımýr Noǵaıbaev.
Al otbasylyq-turmystyq saladaǵy qylmys sany 16 paıyzǵa tómendegen. Osy jyldyń 7 aıynda polıtsııa 4 myńnan astam qorǵaý nusqamasyn shyǵarǵan. 808 adamǵa qatysty sot qaıtalama zorlyq-zombylyqqa jol bermeýge baǵyttalǵan arnaýly shekteý belgilengen. Sonymen qatar 37 quqyq buzýshy psıhologııalyq túzetý baǵdarlamalarynan ótýge joldandy.
Eske salaıyq, Almatyda jyl basynan beri alkogoldik masań kúıde 224 qylmys jasaldy.
