Almatyda myńnan astam turǵyn janýarlardan zardap shekken
ALMATY. KAZINFORM — Almaty qalasynyń bas sanıtarlyq dárigeri Qasymhan Alpysbaıuly qutyrma aýrýynyń aldyn alý joldaryn aıtty.
Onyń sózinshe, qutyrma — aýrýy bar janýar tistegennen keıin paıda bolatyn, júıke júıesiniń aýyr zaqymdanýyna ákeletin jáne ólimge ákelýi múmkin jedel vırýstyq ınfektsııalyq aýrý. Infektsııa kózderi kóbine ıt pen mysyq, sondaı-aq jabaıy janýarlar.
— Inkýbatsııalyq kezeń orta eseppen 1 aıdan 3 aıǵa deıin sozylady. Inkýbatsııalyq kezeńniń uzaqtyǵyna tistegen jerdiń ornalasýy áser etedi. Eń qysqa kezeń bet, bas aımaǵyn tistegende baıqalady, al eń uzaq kezeń aıaq-qoldardyń tómen jaǵyr tistegende bolady. Respýblıka kóleminde keıingi 10 jyl ishinde 22 adam qutyrmamen aýyrdy, — dedi ol.
Mamannyń aıtýynsha, janýar tistegen jaǵdaıda oǵan beıjaı qaraýǵa bolmaıdy. Zardap shekken azamat dereý dárigerlerge júginip, alǵashqy medıtsınalyq-sanıtarlyq kómek alýy qajet. Onyń tistelgen jeri sabyndy-sýly eritindimen jýylyp, qutyrýǵa qarsy antırabııalyq ımmýnoglobýlın men vaktsına arqyly shuǵyl ımmýndaý júrgiziledi.
— Jyl basynan beri Almaty qalasynda janýarlardan zardap shekken adamdardyń sany — 1776. Onyń ishinde — 72,6% belgisiz ıtter men basqa da jabaıy janýarlardan zardap shekken. Barlyq jaǵdaıda qutyrýǵa qarsy profılaktıkalyq ekpeler taǵaıyndaldy, — dedi sanıtarlyq dáriger.
Sonymen qatar ol Almaty qalasynda 6 medıtsınalyq uıymnyń travmatologııalyq pýnktteri antırabııalyq kómek kórsetetinin aıtty. Atap aıtqanda:
- № 7 qalalyq klınıkalyq aýrýhana («Qalqaman» yqsham aýdany, Raıymbek kóshesi, 20. Telefon: 8 (727-27) 0-86-04) — Alataý, Áýezov, Naýryzbaı aýdandarynyń turǵyndaryna qyzmet kórsetedi;
- Qalalyq jedel shuǵyl kómek kórsetý aýrýhanasy (Qazybek bı kóshesi, 96. Telefon: 8 (727-29) 2-31-01) — Alataý, Almaly aýdandarynyń turǵyndaryna qyzmet kórsetedi;
- Ortalyq qalalyq klınıkalyq aýrýhana (Jandosov kóshesi, 6 úı) — Bostandyq jáne Medeý aýdandarynyń turǵyndaryna qyzmet kórsetedi;
- № 4 qalalyq klınıkalyq aýrýhana (Papanın kóshesi, 220 úı.Telefon: 8 (727-30) 0-37-01) — Jetisý jáne Túrksib aýdandarynyń turǵyndaryna qyzmet kórsetedi;
- № 5 qalalyq klınıkalyq aýrýhana (Dostyq dańǵyly, 220 úı. Telefon: 8 (727-26) 4-77-62) — barlyq aýdandardyń turǵyndaryna qyzmet kórsetedi (bet pen bas tistegen kezde);
- Balalar qalalyq klınıkalyq juqpaly aýrýlar aýrýhanasy (Manas kóshesi, 40 úı. Telefon: 8 (727-27) 4-45-43) — qala turǵyndaryna qyzmet kórsetedi.
Eske salaıyq, byltyr mysyq tistegen mańǵystaýlyq turǵyn qutyrma aýrýynan kóz jumdy.
