Almatyda myńǵa jýyq shaqyrym jylý jelileri tozǵan

ALMATY. KAZINFORM – Almaty qalasynyń ákimi Erbolat Dosaev 2023-2024 jyldardaǵy jylytý maýsymy boıynsha jumys keńesin ótkizdi.

Almaty ákimdiginiń málimetinshe, búgingi tańda barlyq áleýmettik nysandar men kóppáterli turǵyn úıler (KTÚ – 8 863, bilim berý obektileri – 404, densaýlyq saqtaý obektileri - 128) úzdiksiz jylýmen qamtamasyz etilgen. Jylý kózderi men jylý jelilerinde temperatýralyq rejım bekitilgen kestege sáıkes saqtalady.

«Jylý berý maýsymy kezinde qala qyzmetteri joǵary ázirlik rejıminde jumys istep tur. Shtattan tys jaǵdaılardy ýaqtyly joıý úshin barlyq qajetti qurylǵylarmen jabdyqtalǵan apatty joıý brıgadalary jumys isteıdi. Bul iske barlyǵy 400-ge jýyq adam, 100-den astam arnaıy tehnıka jumyldyrylǵan», - dep habarlady ákimdikte.

Megapolıs ákimi ınfraqurylymnyń tozýyn azaıtýǵa baǵyttalǵan ınvestıtsııalyq baǵdarlamany iske asyrýǵa basa nazar aýdardy. Almaty qalasy boıynsha jylý jelileriniń jalpy tozýy 59,2%-dy qurady, ótken jyly jasalǵan sharalar tozýdy jospardaǵy 0,6%-ǵa emes, 1,3% - ǵa azaıtýǵa múmkindik berdi. Osylaısha, bıylǵy jyldyń basynda 25 jyldan astam ýaqyt paıdalanylyp, tozǵan jelilerdiń uzyndyǵy 802,6 shaqyrym nemese jelilerdiń barlyq uzyndyǵynyń 57,9%-yn qurady.

Sondaı-aq bıyl jalpy uzyndyǵy 20 shaqyrym jylý jelilerin rekonstrýktsııalaý jumystary josparlanýda, bul jylý jelileriniń tozýyn 1,8% - ǵa tómendetýge múmkindik beredi.