Almatyda mylqaý taksı júrgizýshisine qurmetsizdik tanytqan bloger polıtsııaǵa jetkizildi

ALMATY. KAZINFORM – Almatyda bloger qulaǵy durys estimeıtin júrgizýshi basqarǵan taksıge otyryp, beıádep beınejazba túsirgen.

Onyń bul qylyǵyna áleýmettik jeliniń ózge qoldanýshylary shaǵym bildirdi. Keıin bloger óz qylyǵy úshin keshirim surap, beınejazbany óshirgen.

Degenmen, Almaly aýdandyq polıtsııa basqarmasynyń qyzmetkerleri beınejazba avtoryn polıtsııa bólimshesine jetkizdi.

- Qyz balaǵa qatysty túsindirý jáne aldyn alý áńgimesi júrgizildi, onyń maqsaty – mundaı áreketterdiń qaıtalanýyna jol bermeý. Ol óz kinásin moıyndap, ókinetinin bildirdi. Polıtsııa áleýmettik jeli qoldanýshylaryn jarııalaıtyn kontentke jaýapkershilikpen qarap, qoǵamdaǵy etıka, moral jáne ózara qurmet qaǵıdalaryn saqtaýǵa shaqyrady, - dep habarlady polıtsııa.

Eske salaıyq, buǵan deıin Astanada daýly vıdeo jarııalaǵan tanymal bloger qamaýǵa alyndy.