Almatyda MIB pen PIK qaryzdary kommýnaldyq tólem túbirteginde kórsetiledi
ALMATY. KAZINFORM — Osy jyldyń tamyz aıynan bastap elektr energııasy úshin tólem túbirtekterinde MIB, PIK nemese basqarýshy kompanııanyń «Energosbyt» aldyndaǵy bereshegi týraly aqparat kórsetile bastaıdy.
Bul jańashyldyq tek «Alataý Jaryq Kompanııasy» AQ «Energosbyt» fılıalymen elektrmen jabdyqtaý shartyn jasasqan Almaty qalasy men Almaty oblysy tutynýshylaryna ǵana qatysty bolmaq.
Uıym málimetinshe, bul ózgeris páter ıelerine óz úıleri boıynsha qaryzdyń bar-joǵyn ýaqytyly bilip otyrýǵa jáne basqarýshy uıymnyń elektr energııasyn tóleý boıynsha mindetin qanshalyqty oryndap jatqanyn baqylaýǵa múmkindik beredi.
Eger bereshek belgilengen tártippen ótelmese, qaryzy bar turǵyn úılerde toq ýaqytsha ne múldem óshirilýi múmkin. Osyǵan baılanysty turǵyndarǵa túbirtektegi jańa aqparatqa kóńil bólý usynylady. Qaryz anyqtalǵan jaǵdaıda, onyń sebepterin anyqtaý jáne óteý sharalaryn qabyldaý úshin MIB, PIK nemese basqarýshy kompanııaǵa ýaqytyly júgingen jón.
— Túbirtekte qaryz somasyn kórsetý — bul ashyq aqparat sharasy. Ol páter ıelerine óz úıiniń esep aıyrysý jaǵdaıyn kórýge jáne elektr energııasyn berýde másele týyndamas úshin ýaqytyly shara qoldanýǵa múmkindik beredi, — delingen «AJK» málimdemesinde.
Eske salaıyq, buǵan deıin Almatyda jaryq joqtyǵyna shaǵymdanǵan turǵyndar kósheni jappaq boldy.
