Almatyda MIB men PIK qyzmetine baqylaý kúsheıedi
ASTANA. KAZINFORM – Almatyda kóppáterli turǵyn úılerdi basqarý organdaryna baqylaý kúsheıtilip, bıyl shamamen 300 tekseris júrgizý josparlanyp otyr.
Óńirlik kommýnıkatsııalar qyzmetinde ótken brıfıngte qalalyq kommýnaldyq ınfraqurylym jáne turǵyn úı ınspektsııasy basqarmasy basshysynyń orynbasary Jandos Qaıyrhanov málimdedi.
Onyń aıtýynsha, qalada 9,6 myńǵa jýyq kóppáterli turǵyn úı bar. Olarǵa 2,5 myńnan astam sýbekt – MIB (múlik ıeleriniń birlestigi), PIK (páter ıeleri kooperatıvi) jáne basqarýshy kompanııalar qyzmet kórsetedi.
Ótken jyly 265 tekseris júrgizilip, nátıjesinde 66 ákimshilik hattama toltyrylǵan. 37 sýbekt jaýapkershilikke tartylyp, jalpy somasy 10 mln teńgeden astam aıyppul salynǵan. Bıyldyń ózinde 151 tekseris bastalǵan.
– Turǵyndardyń shaǵymdarynyń artýyna negizgi sebep – turǵyn úı qorynyń tozýy. Kapıtaldyq jóndeýdiń der kezinde júrgizilmeýi, ınjenerlik júıelerdiń eskirýi jáne jınaqtalǵan máseleler jaǵdaıdy kúrdelendirip otyr, – dedi Jandos Qaıyrhanov.
Qalada turǵyn úı-kommýnaldyq sharýashylyqty jańǵyrtý jumystary jalǵasýda. 2011–2025 jyldar aralyǵynda 1 316 kóppáterli úıge kúrdeli jóndeý júrgizilip, 2 372 lıft aýystyrylǵan. 2026 jyly taǵy 100 úıdi jóndeý jáne 45 lıftini aýystyrý josparlanǵan.
Sonymen qatar turǵyn úılerdi basqarý júıesine qatysty zańnamalyq ózgerister engizildi. Atap aıtqanda, «jaı seriktestik» nysany alynyp tastalyp, endi eki negizgi model – MIB jáne tikeleı birlesken basqarý qarastyrylǵan. MIB tóraǵasynyń ókilettik merzimi úsh jylǵa deıin uzartylyp, basqarýshy kompanııalardy tartý múmkindigi keńeıtildi.
Turǵyndar jınalysyn ótkizý tártibi de jańartyldy: endi olardy oflaın jáne onlaın formatta ótkizýge bolady. Al turǵyn úı ınspektsııasynyń quzyretine úılerdiń jylytý maýsymyna daıyndyǵyn jáne órtke qarsy júıelerdiń jaǵdaıyn baqylaý qosyldy.
Qoldanystaǵy PIK-ter aǵymdaǵy jyldyń shilde aıyna deıin qaıta tirkeýden ótýi tıis. Talaptar oryndalmaǵan jaǵdaıda kooperatıvterdi májbúrli túrde taratý qarastyrylǵan.
Sondaı-aq zańda ýaqytsha basqarýshy kompanııalar ınstıtýty engizilgen. Bul jańa úılerge nemese turǵyndary basqarý formasyn áli tańdamaǵan nysandarǵa qatysty qoldanylady.
Aıta keteıik, páter ıeleri MIB qurý kezinde tegin keńes ala alady.
