Almatyda metromen júretinder sany artty

Almaty metropolıteni turǵyndardyń metroda jolaýshylardyń shamadan tys kóptigine qatysty shaǵymyna jaýap berdi, dep habarlaıdy QazAqparat tilshisi. 

«Metropolıten» kommýnaldyq memlekettik kásipornynyń málimetinshe, Almaty metrosyndaǵy jolaýshylar aǵynyna turaqty túrde monıtorıng pen taldaý júrgiziledi.

«Búginde jelide 10 quram júredi, olardyń árqaısysy 900 adamǵa deıin syıymdylyǵy bar 4 vagonnan turady. Taldaýǵa sáıkes, jańa oqý jylynyń bastalysymen tańǵy saǵat 08:00-den 09:00-ge deıin Momyshuly men Raıymbek stantsııalarynda 1400 adamǵa deıin jolaýshylar sany baıqalady. Keshki 19:00-den 20:00-ge deıin Jibek joly jáne Momyshuly stantsııalarynda 1600 adamǵa deıin jetedi. Qalǵan saǵattarda jolaýshylar sany – 400-600 adam. Quramdar arasyndaǵy qozǵalys aralyǵy 6 mınýt 12 sekýnd», - dep habarlady «Metropolıten» KMK-da.

Sondaı-aq «Metropolıten» kásiporny qazir jelide quramdar sanyn kóbeıtý men qozǵalys aralyǵyn azaıtý máselesi qarastyrylyp jatqanyn málimdedi.