Almatyda metro men vokzal jerasty tonneli arqyly baılanysady
ALMATY. KAZINFORM — «Almaty-2» temir jol vokzaly men «Raıymbek batyr» metro beketiniń arasynda jerasty tonneli salynady.
Qalalyq mobıldilik basqarmasy Kazinform saýalyna jaýap berip, qurylys jobasy ázirlenip jatqanyn rastady.
— «Almaty-2» temir jol vokzaly men «Raıymbek batyr» metro beketi bir-birinen aıtarlyqtaı alshaq ornalasqan. Bul mańyzdy kólik toraptary arasynda jolaýshylardyń aýysyp otyrýyn qıyndatady. Osyǵan baılanysty jerasty tonneli bir toraptan ekinshisine qaýipsiz ári jyldam barýǵa múmkindik beredi, — dep habarlady basqarmadan.
Joba boıynsha tonneldiń uzyndyǵy 485 metr, eni 6,3 metr jáne bıiktigi 3 metr bolady. Oǵan qosa, 42 metr bolatyn qosymsha jerasty dáliz, eki kireberis, eki lıft shahtasy jáne apattyq shyǵý joly salynady. Odan bólek jarnama taqtalary men jol belgileri qoıylady.
— Jobanyń quny memlekettik saraptamanyń qorytyndysy boıynsha belgili bolady, — delingen basqarma jaýabynda.
Qurylys jumystary 2025 jyldyń úshinshi toqsanynda bastalyp, 12 aıdan keıin aıaqtalady dep josparlanǵan.
Eske salaıyq, buǵan deıin Almatyda eki kópqabatty avtoturaqtyń jobasy ázirlenip jatqanyn jazǵanbyz.