Almatyda metro men shetki aýdandardy baılanystyratyn avtobýs baǵyttary ashylady
ALMATY. KAZINFORM – Almatyda 6 maýsymnan bastap №134 jáne №140 jańa qalalyq avtobýs baǵyttary iske qosylady.
Almatynyń jol qozǵalysy jáne jolaýshylar kóligin uıymdastyrý basqarmasynyń ókilderiniń málimetinshe, baǵyttarǵa «NomadBus» JShS qyzmet kórsetedi. Kún saıyn jelige Yutong markaly 23 avtobýs shyǵady. Olar – uzyndyǵy 12 metr bolatyn tómen edendi elektr avtobýstar. Ár avtobýstyń syıymdylyǵy 90 jolaýshyǵa arnalǵan, bul qarbalas ýaqytta joǵary jolaýshylarǵa tıimdi qyzmet kórsetýge múmkindik beredi.
– Jańa baǵyttardy iske qosý tasymaldaýshynyń jeke ınvestıtsııa esebinen júzege asyryldy. Elektr avtobýstardy satyp alý men qarjylandyrý «NomadBus» JShS-niń qarajaty esebinen júrgizilip, qala bıýdjeti qarajaty paıdalanylǵan joq, - delingen habarlamada.
№134 baǵyt Almaty-1 temirjol vokzalyn «Avtostantsııa» sońǵy aıaldamasymen baılanystyrady. Baǵyttyń uzyndyǵy – 39,7 shaqyrym. Avtobýstar kún saıyn saǵat 05:50-den 23:00-ge deıin qatynaıdy.
№140 baǵyt «Raıymbek batyr» metro beketin «Taýly qyrat» shaǵynaýdanyndaǵy sońǵy aıaldamamen baılanystyrady. Baǵyttyń uzyndyǵy – 18,4 shaqyrym. Avtobýstar kún saıyn saǵat 05:55-ten 23:00-ge deıin júredi.
Eske salaıyq, buǵan deıin Almatyda jańa №145 avtobýs baǵyty qatynaı bastaǵanyn habarlaǵan edik.
