Almatyda metro qurylysyn baqylaıtyn shtab qurylady
ALMATY. KAZINFORM — Almaty ákimi metro qurylysyn apta saıyn baqylap otyrady.
Almaty ákimdiginen málim etkendeı, Darhan Satybaldy jańa metro beketiniń qurylys barysyn tekserdi. Jobaǵa sáıkes, qoldanystaǵy «Baýyrjan Momyshuly» beketinen «Qalqaman» beketine deıingi aralyqtaǵy tonneldiń uzyndyǵy – 1,98 shaqyrym. Qazir sol jaq baǵyttaǵy tonnel tolyq qazylyp bitken, al oń jaq baǵytta 887 metr jer qazylǵan.
«BCN group» dırektorlar keńesiniń tóraǵasy Aleksandr Belovıchtiń aıtýynsha, tonnel qazý jumystarymen bir ýaqytta stantsııanyń qurylysy da belsendi túrde júrgizilip jatyr. Qazir jeldetý uńǵymasy salyndy, qazý jumystary aıaqtaldy, al beton quıý jumystary 28 paıyz oryndaldy.
— Nysandy 2026 jyldyń qańtar aıyna deıin tolyq aıaqtaý úshin qurylys qarqynyn arttyrý qajet. Osy maqsatta arnaıy shtab qurylatyn bolady. Onyń quramyna qala ákiminiń sala boıynsha orynbasary, tıisti basqarma basshylary, merdiger uıym ókilderi, sondaı-aq tehnıkalyq jáne avtorlyq qadaǵalaý mamandary kiredi. Shtab otyrystarynda jumystardyń barysy apta saıyn talqylanyp, qatań baqylaýda bolady, - dedi Almaty ákimi.
Qurylys alańynda qala ákimine metro jelisin ári qaraı keńeıtý boıynsha atqarylyp jatqan jumystar týraly da baıandaldy.
Almaty qalasy ákiminiń orynbasary Asqar Ámrınniń aıtýynsha, «Qalqaman» stantsııasynan «Barlyq» bazaryna deıingi aralyqta taǵy úsh beketti qamtıtyn jańa baǵyttyń jobalyq-smetalyq qujattamasy daıyndaldy. Jobany qurylys bastalǵan sátten bastap úsh jyl ishinde júzege asyrý josparlanyp otyr.
Sonymen qatar «Jibek joly» stantsııasynan halyqaralyq áýejaıǵa deıingi ekinshi jeliniń tehnıkalyq-ekonomıkalyq negizdemesi ázirlenip jatyr. Al «Saıran» stantsııasynan Alataý qalasyna deıingi úshinshi jeliniń tehnıkalyq-ekonomıkalyq negizdemesin daıyndaýǵa baıqaý jarııalandy.
— Biz «Barlyqqa» deıingi jeli qurylysyn kútip otyrmaı, metronyń taǵy eki jelisiniń qurylysyn qatarynan bastaýdy qarastyrýymyz kerek. ıAǵnı, úsh jyl kútpeı, barlyq jeli boıynsha jumys qatar júrýi tıis. Jalpy, metro – Almaty qalasynyń kólik júıesiniń mańyzdy elementi. Ol qala turǵyndarynyń qozǵalysyn jeńildetip, kún saıyn qala joldarymen júretin kólik sanyn azaıtýǵa múmkindik beredi. Sondyqtan metropolıtendi damytýǵa erekshe nazar aýdarylatyn bolady, - dep atap ótti Darhan Satybaldy.
Osyǵan deıin Almaty metrosynyń jańa úsh jelisi salynatyny týraly jazǵan bolatynbyz.