Almatyda metro qurylysyn «Altyn orda» bazaryna qaraı damytý jospary usynyldy
ALMATY. KAZINFORM – Almaty ákimi Darhan Satypaldy metrony «Qalqaman» stansasynan «Barlyq» bazary aýdanyna deıingi aralyǵyndaǵy qurylys barysyn baryp kórdi.
Almatyda jańa metro jelisiniń uzyndyǵy bes shaqyrymnan asady. Jobaǵa úsh stantsııa kiredi. Olar Naýryzbaı aýdandyq ákimdigi mańynda, Alataý dańǵyly men Tóle bı kóshesiniń qıylysynda jáne «Barlyq» bazarynyń janynda bolady. Munda qalaaralyq avtobeket, metro, jeńil relsti kólik pen avtoturaqty biriktiretin iri kólik haby qurylmaq.
Erekshe nazar «Qalqaman» stantsııasyna aýdarylyp otyr. Onyń qyzmetin táýligine 100 myńnan astam jolaýshy paıdalanady dep boljanyp otyr. Nysanda negizgi jer qazý jumystary aıaqtaldy, bir tonnel tolyq qazylyp, ınjenerlik júıeler ornatylyp jatyr. Monolıt quıý jumystarynyń 75%-dan astamy oryndalǵan. Jobada platforma aımaǵy, eki vestıbıýl, úsh kireberis, tehnıkalyq blok qarastyrylǵan.
Bas merdiger qurylysty merziminen buryn aıaqtaýdy josparlap otyr. Qarashada betondaý jumystary aıaqtalyp, ınjenerlik jáne árleý kezeńi bastalady. Qurylǵy men materıaldar da aldyn ala daıyndalyp jatyr.
Joba boıynsha jalpy uzyndyǵy úsh shaqyrymnan asatyn eki tonnel salynady. Onyń biri tolyq qazylyp, onda zamanaýı tehnologııamen rels tóseý bastaldy. Bul poıyzdardyń tynysh ári jaıly qozǵalýyna múmkindik beredi. Ekinshi tonneldiń qazý jumystary jalǵasýda, aıaqtaý kelesi jyldyń basyna josparlanǵan.
Osyǵan deıin Almatyda burynǵy temirjol aýrýhanasyn qaıta jańartý jumystary taǵy da keıinge qalǵany týraly jazdyq.