Almatyda meshit pen kompıýterlik klýbta telefon urlaǵan kúdikti ustaldy

ALMATY. KAZINFORM — Medeý aýdanynyń polıtsııa qyzmetkerleri alaıaqtyq jasady jáne bótenniń múlkin urlady degen kúdikpen jergilikti turǵyndy ustady.

Polıtsııa málimetine sáıkes, kúdiktiniń meshittegi urlyǵy vıdeoǵa túsip qalǵan.

— Birinshi jaǵdaıda ol kompıýterlik klýbqa kelýshini aldap, onyń uıaly telefonyn tartyp alǵan. Taǵy bir jaǵdaıda qalalyq meshitterdiń biri qylmystyq is-áreket alańyna aınaldy. Erkin kirý múmkindigin paıdalanǵan qaskóı bóten bireýdiń uıaly telefonyn urlap, izin sýytqan. Onyń bul áreketi kameraǵa túsip qalǵan. Jedel is-sharalardyń nátıjesinde kúdikti ustaldy. Ol qamaýǵa alyndy, — dedi Medeý aýdandyq PB qarasty polıtsııa bóliminiń bastyǵy Eldos Baqbergenov.

QR Konstıtýtsııasynyń 77-baby 3-bólimi, 1-tarmaǵy, QR QK-niń 19-baby 1-tarmaǵyna saı kez kelgen azamat sot sheshimi zańdy kúshine engenge deıin kinásiz dep sanalady.

Eske salaıyq, buǵan deıin Almatyda áıeldi tapashamen qorqytyp, tonap ketken kúdikti ustalǵanyn jazǵanbyz.