Almatyda merzimi ótip ketken azyq-túlik tómen baǵada saýdalanyp jatyr
ALMATY. KAZINFORM – Almatyda jaramdylyq merzimi ótip ketken azyq-túlik satatyn dúken jumys isteıdi. Kazinform tilshisi atalǵan saýda ornyna baryp, kórdi.
Optomarket dúkeni – Almatynyń ortalyǵynda jańadan boı kótergen turǵyn úı kesheninde ornalasqan. Naqtyraq aıtar bolsaq, Nazarbaev pen Mámetova kóshesiniń qıylysy. «Úsh qońyr» TÚ.
Optomarkette tek merzimi ótip ketken azyq-túlik jáne kúndelikti turmysta qoldanatyn zattar satylady. Baǵasy tómen bolǵandyqtan, satyp alýshylary da bar. Solardyń biri almatylyq Aıdyn Raqymbek. Aıtýynsha, bul jerdiń ashylǵanyna bir jylǵa jýyqtaǵan.
«Bul jerdi dúken emes, qoıma degen durys shyǵar. Men osy mańda turamyn. Byltyr qysta ashyldy. Іshindegi taýarlardyń baǵasy qalta kóteredi. Jasyratyny joq, jaramdylyq merzimi ótip ketken nemese bitýine az qalǵan. Bastapqyda bilmeı qytaı kespesin satyp alyp, úıge baryp qarasam merziminiń ótip ketkenine bir jyl bolǵan eken. Sondyqtan qaıta ákelip, ótkizip tastadym. Qazir bul jerden azyq- túlik almaımyn, tek maılyq, sabyn sııaqty dúnıelerdi alamyn», - deıdi turǵyn.
Dúken sóresinde tuzdalǵan qyzanaq pen kókónis ıkrasy tizilip tur. Baǵasy basqa saýda núktelerimen salystyrǵanda eki ese arzan. Satýshysy onyń sebebin túsindirýden bas tartty.
Bankanyń syrtynda tuzdalǵan kókónistiń jaramdylyq merzimi -3 jyl dep jazylǵan. Demek, 2021 jyldyń tamyz aıynda shyqqan tuzdyqtardyń qoldaný merizimi eki aı buryn bitken.
Osy jaǵdaı boıynsha qalalyq ákimdikke saýal joldaǵan edik. Qysqa ǵana jaýap aldyq.
«Dúkendegi taýarlardy tekserýge quqyǵymyz joq»,- dep habarlady ákimdikten.
Sonymen qatar, Kazinform redaktsııasy Almaty qalalyq sanıtarlyq-epıdemıologııalyq baqylaý departamentine resmı saýal joldap qoıdy.
Osyǵan deıin «Jańa adamdar» qozǵalysynyń belsendileri «Vremıa ısteklo» jobasy sheńberinde azyq-túlik dúkenderin tekserip, merzimi ótken taýarlardy anyqtap jatqany týraly jazǵan edik.
