Almatyda merzimi ótken dárilerdi jınaýǵa arnalǵan aktsııa ótedi
ALMATY. KAZINFORM — Almatyda 15-16 sáýir kúnderi paıdalanylmaǵan ári jaramdylyq merzimi ótken dári-dármekterdi tapsyrýǵa arnalǵan ekologııalyq aktsııa uıymdastyrylady.
«Eco Almaty» JShS málimetinshe, turǵyndar dári-dármekterdi qaladaǵy emhanalarda ornatylǵan arnaıy konteınerlerge tapsyra alady.
— Aktsııanyń maqsaty — qorshaǵan ortaǵa zııan keltiretin qaýipti zattardyń topyraq pen sý kózderine taralýyna jol bermeý, sondaı-aq medıtsınalyq preparattardy qaýipsiz túrde joıýdy qamtamasyz etý, — dep habarlady kompanııadan.
Qoldanystaǵy zańnamaǵa sáıkes, jaramdylyq merzimi ótken dári-dármekter arnaıy lıtsenzııasy bar uıymdar arqyly, sonyń ishinde joǵary temperatýrada órteý ádisimen joıylýy tıis. Olardy turmystyq qaldyqtarmen birge tastaýǵa nemese káriz júıesine tógýge qatań tyıym salynady. Sebebi mundaı áreketter qorshaǵan ortanyń lastanýyna jáne antıbıotıkterge tózimdiliktiń kúsheıýine ákelýi múmkin.
Aktsııa tabletka, kapsýla, maı, krem, gel, ampýla, quty, shárbat men suıyq eritindi syndy dári-dármekter qabyldanady. Al shprıts, ıne, sıstema, maqta, bınt jáne qanmen janasqan ózge de medıtsınalyq qaldyq qabyldanbaıdy. Dári-dármekterdi tapsyrar aldynda olardy tyǵyz qaptamaǵa salyp oraý kerek.
Qazir Almatyda qalalyq emhanalarda ornatylǵan 36 ekoboks jumys istep tur. Aktsııa «Taza Qazaqstan» ekologııalyq baǵdarlamasy aıasynda júzege asyrylady.
Eske salaıyq, Aqtaýda qant dıabetine shaldyqqan naýqastar tegin dáriden qaǵylyp, tyǵyryqqa tireldi.
