Almatyda merekedegi demalys kúnderi jedel járdem qyzmetine 9 myń adam júgindi

Almatyda jańa jyldyq demalys kúnderi «102» pýltine 2 myńnan qala turǵyndary qońyraý shaldy, al jedel járdemge 9 myń shaqyrtý túsken, dep habarlaıdy dep Kazinform.

Almatynyń Óńirlik kommýnıkatsııalar qyzmeti demalys kúnderi bolǵan oqıǵalarǵa qysqasha sholý jasady. 

Almaty qalasy Polıtsııa departamentiniń jedel basqarý ortalyǵynyń málimetinshe, megapolıste 3 kún ishinde 44 qylmys tirkelgen. Olar negizinen turmystyq sıpattaǵy oqıǵalar. Aýyr jáne asa aýyr qylmystar tirkelmegen. 

Patrýldik polıtseıler, ýchaskelik ınspektorlar jáne jedel qyzmetkerlerdiń shuǵyl áreketiniń arqasynda 38 qylmys ashyldy. Sonymen qatar jańa jyldyq mereke kúnderi polıtseıler 500-den astam quqyq buzýshylyqty anyqtap, jolyn kesti. 

Osy kúnderi «102» pýltine 2 myńnan astam qońyraý kelip tústi, olardyń basym bóligi – anyqtama alý sıpatyndaǵy aqparat. 

Almaty qalalyq Tótenshe jaǵdaılar departamenti bıyl megapolıste Jańa jyl merekesi salystyrmaly túrde tynysh bolǵanyn atap ótti. Qutqarýshylar da polıtsııa qyzmetkerleri sııaqty kúsheıtilgen rejımde jumys istedi. 

- Almaty TJD derekteri boıynsha merekelik úsh kúnde qutqarýshylar 31 ret shaqyrý boıynsha oqıǵa oryndaryna bardy, onyń 10-y órtke baılanysty. Qaza tapqandar tirkelgen joq, - delingen habarlamada.

Almatylyq dárigerler úshin 2023 jyldyń 31 jeltoqsanynan 2024 jyldyń 2 qańtaryna deıingi aralyq ońaıǵa túspedi. Medıtsınalyq kómek alý úshin mamandarǵa toǵyz myńǵa jýyq adam júgindi. Qala turǵyndary men qonaqtary negizinen dene qyzýynyń kóterilýi men jótelge shaǵymdanǵan. Sonymen qatar ártúrli jaraqat alǵan naýqastar aýrýhanalarǵa jetkizildi.

Pırotehnıkalyq quraldardan jaraqattaný men kúıik shalýdyń 13 jaǵdaıy anyqtaldy jáne 733 JRVI dıagnozy tirkeldi. Jedel medıtsınalyq járdem qyzmetiniń dárigeri Aqmaral Asanova eger táýligine 4 000-ǵa jýyq ótinish tússe, mereke kúnderi olardyń sany 7 000-ǵa deıin kóbeıgenin aıtty.