Almatyda mereke kúnderi qalanyń kommýnaldyq qyzmetteri táýlik boıy jumys isteıdi
Almaty qalasynda jaýyn-shashyn bastaldy, Qazgıdromettiń boljamy boıynsha qardyń bıiktigi 6 sm-ge deıin jetedi dep kútiledi, dep habarlaıdy Kazinform.
Ákimdiktiń málimetinshe, kóktaıǵaqtyń aldyn alý maqsatynda qalanyń negizgi joldary kóktaıǵaqqa qarsy suıyq reagentpen aldyn ala óńdeldi. Sondaı-aq, qalanyń kommýnaldyq qyzmetteri aldyn ala bekitilgen marshrýt boıynsha joldar men trotýarlardyń júris bóligin kóktaıǵaqqa qarsy qospamen óńdeýdi bastady.
«16 jeltoqsan kúndiz 378 arnaıy tehnıka men 1152 jol jumysshysy jumyldyryldy. Aýdan ákimdikterinde qar kúreý jumystaryn baqylaý boıynsha táýliktik kezekshilik uıymdastyryldy», - dep habarlady Almaty ákimdiginiń baspasóz qyzmeti.
Almatyda 16 jeltoqsanda aýa temperatýrasy -3...-5 gradýs aıaz bolsa, 17 jeltoqsanǵa qaraǵan túni -4...-6, 17 jeltoqsanda kúndiz -1...-3 gradýs bolady dep kútiledi.
