Almatyda jer telimderin qaıtarý: memlekettik ýchaskelerge qatysty alaıaqtyq shemasy áshkerelendi

ALMATY. KAZINFORM — Almaty qalasynda A.K. Ábdijaparovqa qatysty memleket menshigindegi jer telimderin alaıaqtyq jolmen ıemdený deregi boıynsha aıyptaý úkimi shyǵaryldy. Bul týraly QMA baspasóz qyzmeti habarlady. 

Atalǵan qylmystyq isti QMA Almaty qalasy boıynsha departamenti júrgizdi.

— Anyqtalǵandaı, Almaty qalasy ákimdiginiń qaýlysymen ýaqytsha paıdalaný quqyǵy negizinde «Almaty» áleýmettik-kásipkerlik korporatsııasy» AQ-ǵa Jýkov kóshesi, 67-ýchaske (2,3 ga) jáne Jamakaev kóshesi, 77-ýchaske (6,3 ga) mekenjaılarynda ornalasqan jer telimderi 5 jyl merzimge berilgen. Buryn «Azamattarǵa arnalǵan úkimet» kommertsııalyq emes aktsıonerlik qoǵamynyń qyzmetkeri bolyp jumys istegen Ábdijaparov jyljymaıtyn múlikti tirkeý júıesiniń qalaı jumys isteıtinin bile otyryp, ýákiletti organdarǵa jer telimderin ýaqytsha paıdalanýdan bas tartý týraly jalǵan kelisimder men jer telimderi jeke menshikke berildi degen jalǵan ákimdik qaýlylaryn tapsyrǵan, — delingen habarlamada. 

Alaıda is júzinde mundaı qaýlylar ákimdik tarapynan shyǵarylmaǵan.

Osynyń nátıjesinde ol atalǵan jer telimderin zańsyz túrde óziniń «Aısha Grýpp» JShS-niń atyna qaıta tirkegen.

Keıin bul jer telimderin úshinshi tulǵalarǵa 1,3 mlrd teńgege satyp jibergen.

Sottyń sanktsııasymen naryqtyq quny 13,6 mlrd teńge bolatyn jer telimderine tyıym salyndy.

Sot úkimimen Ábdijaparov Qylmystyq kodeksiniń 190-baby 4-bóligi 2-tarmaǵy (iri mólsherdegi alaıaqtyq) boıynsha kináli dep tanylyp, oǵan 7 jyl bas bostandyǵynan aıyrý jazasy taǵaıyndaldy.

Jer telimderi memleket menshigine qaıtaryldy, olardyń aýmaǵynda ınnovatsııalyq hab salý josparlanyp otyr.

Sot úkimi zańdy kúshine endi.

Aıta ketelik elordada memleket qajetine 58 jer telimi alynatyny týraly jazǵan edik.