Almatyda memlekettik múlikke qatysty alaıaqtyq shemany uıymdastyrǵandar sottaldy

ASTANA. KAZINFORM – Sot kinálilerge 6 jyl 6 aı merzimge bas bostandyǵynan aıyrý jazasyn taǵaıyndady. 

Almaty qalasynda memleket paıdasyna tárkileýge jatatyn múlikti ıemdený maqsatynda «Jyljymaıtyn múliktiń biryńǵaı memlekettik kadastry» aqparattyq júıesine jalǵan málimetter engizýdi uıymdastyrǵan adamdar tobyna qatysty sot úkimi shyqty.

Eske salsaq, buǵan deıin Qarjylyq monıtorıng agenttigi Kospaevtyń basshylyǵymen áreket etken uıymdasqan qylmystyq topqa qatysty tergeýdi aıaqtaǵan. Atalǵan top «AV-Construction» JShS, «Stekolnyı zavod» JShS, «Shalqar 17» JShS, «Bahar-A» JShS jáne basqa da kásiporyndardy reıderlik jolmen basyp alý faktileri boıynsha áshkerelengen.

Sottyń sheshimimen tárkileý maqsatynda Almaty qalasyndaǵy «Nıkolskıı» bazary aýmaǵynda ornalasqan «Nikolsky Investment» JShS-ne tıesili jer telimi men múlkine tyıym salynǵan.

— 2025 jyldyń qyrkúıek aıynda Aslan Pýhaev, Anton Solovev pen Jaqsylyq Sársenbaev «Azamattarǵa arnalǵan úkimet» memlekettik korporatsııasynyń aqparattyq júıesine jalǵan málimetter engizý arqyly atalǵan tyıymdy zańsyz alyp tastaýdy uıymdastyrǵan.

Keıinnen jalpy quny 2,2 mlrd teńge bolatyn múlik pen jer telimin ári qaraı satý maqsatynda jalǵan tulǵalardyń atyna qaıta rásimdelgen, — delingen QMA habarlamasynda.

Sot kinálilerge 6 jyl 6 aı merzimge bas bostandyǵynan aıyrý jazasyn taǵaıyndady.

Úkim zańdy kúshine endi. Múlik memleket menshigine qaıtaryldy.

Aıta ketelik QMA blogerler Erbolat Janabylov pen Elmıra Tolegenovaǵa qatysty sotqa deıingi tergep-tekserýdi aıaqtaǵan edi.