Almatyda memlekettik qarjylandyrýǵa úmitker 95 kınojoba baıqaýǵa qatysyp jatyr
ALMATY. KAZINFORM — Almatyda kınojobalar pıtchıngi bastaldy.
Ulttyq kınony qoldaý memlekettik ortalyǵynyń málimetinshe, bıyl baıqaýdyń fınaldyq kezeńine memlekettik qarjylaı qoldaý men ulttyq fılm mártebesine úmitker 95 kınojoba qatysyp jatyr.
Jalpy kınojobalar baıqaýy bıyl 1 naýryzda bastaldy. Alǵashqy kezeńine elektrondy formatta jalpy sany 323 ótinim kelip túsken. Usynylǵan materıaldardy tekserý nátıjesinde 277 joba Saraptama keńesiniń qaraýyna joldandy. Birinshi kezeń qorytyndysy boıynsha stsenarııler men stsenarıılik josparlar formatynda usynylǵan 107 joba kelesi kezeńge ótti. Al tolyq qujattar toptamasyn qaraý nátıjesinde 95 joba pıtchıngke qatysý quqyǵyna ıe boldy.
Bıyl basym baǵyttar qataryna otbasy qundylyqtary men urpaq sabaqtastyǵy, tarıh pen mádenı mura, qazirgi zamanǵy eńbek adamynyń beınesi, balalar kınosy, ekologııa, sport jáne salaýatty ómir salty, sondaı-aq birlik, beıbitshilik pen qoǵamdyq kelisim ıdeıalary engizildi.
Ashyq qorǵaýdyń alǵashqy kúninde qatysýshylar Saraptama keńesine kórkem fılmder sanatyndaǵy jobalaryn tanystyrdy. Úsh kún boıy avtorlar óz jumystaryn usynyp, onyń qorytyndysy boıynsha memlekettik qarjylaı qoldaýǵa jáne ulttyq fılm mártebesine úmitker jobalarǵa qatysty usynymdar qalyptastyrylady.
Ulttyq kınony qoldaý memlekettik ortalyǵynyń tóraǵasy Qurmanbek Jumaǵalı mundaı irikteýdiń otandyq kınony damytýdaǵy mańyzy týraly aıtty.
— Pıtchıng — baıqaýdyń eń mańyzdy kezeńderiniń biri. Avtorlar jobalaryn Saraptamalyq keńeske tanystyryp qana qoımaı, taqyryptyń ózektiligin, shyǵarmashylyq toptyń kásibı deńgeıin jáne bolashaq fılmniń áleýetin kórsete alady. Kıno ortalyǵy úshin irikteýdiń barlyq kezeńiniń ashyq ári ádil ótýi — basty qaǵıdattardyń biri. Bıylǵy jobalar zamanaýı qazaqstandyq kınonyń damýyna óz úlesin qosyp, kórermen júreginen oryn alady dep senemin, — dedi Qurmanbek Jumaǵalı.
Eske salaıyq, Almaty oblysynda Ońtústik Koreıanyń kıno kompanııasy telehıkaıa túsirip jatyr.
