Almatyda memleketke qaıtarylǵan sý qoımalary qaıtadan senimgerlik basqarýǵa beriledi

QONAEV. KAZINFORM — Almaty oblysynda senimgerlik basqarýǵa berilgen sý qoımalary memleketke qaıtaryldy.

Almaty oblysynyń tabıǵat qorǵaý prokýratýrasynyń málimetinshe, senimgerlik basqarýshylar 8 sý qoımasynyń tıisti tehnıkalyq jaı-kúıin saqtaý jónindegi sharttyq mindettemelerdi oryndamaǵan. Atap aıtqanda, sý sharýashylyǵy júıeleri men qurylystaryna tekserý júrgizbegen.

Sondyqtan sot tártibimen Esik kóli bógeti, Saz Talǵar 7, Baıserke 2, Voroshılovskoe, K 3 qoımalary, kelisim negizinde Teren Qara (joǵarǵy), Saz Talǵar 4, K30/1 sý qoımalary qaıtarylǵan.

Sý qoımalarynyń qazirgi jaǵdaıyna qatysty joldaǵan saýalymyzǵa Almaty oblysynyń sý resýrstary jáne ırrıgatsııa basqarmasy jaýap berdi. Vedomstvo málimetinshe, bul nysandar qazir «Almatyoblsýshar» mekemesiniń teńgeriminde. Alaıda aldaǵy ýaqytta olar qaıtadan senimgerlik basqarýǵa berilmek.

— Nysandarda aǵymdaǵy kúrdeli jóndeý jumystaryn júrgizý úshin jáne jergilikti bıýdjetti ońtaılandyrý maqsatynda qarjy basqarmasymen konkýrs jarııalaý josparlanyp otyr. Negizi talaptar: 5 jylda bir ret kópfaktorly zertteý jumystaryn júrgizý, teńgerim ustaýshynyń aqaý aktisi negizinde kúrdeli jóndeý jumystaryn júrgizý, sondaı-aq jańa 25 jumys ornyn ashý arqyly kóktemgi sýarý naýqany negizinde aýyl sharýashylyǵy taýaryn óndirýshilerdiń jumysyna kedergi keltirmeý, — delingen basqarma jaýabynda.

Eske salaıyq, Shyǵys Qazaqstandaǵy 3 sý qoımasy apatty jaǵdaıda tur.