Almatyda memleketke qaıtarylǵan qarajatqa 10,5 myń turǵyn aýyz sýmen qamtyldy
ASTANA. KAZINFORM — Almatyda memleketke qaıtarylǵan qarajat taý bókterindegi aýdandardyń turǵyndaryn aýyz sýmen qamtamasyz etýge baǵyttaldy, dep habarlaıdy qalalyq prokýratýranyń baspasóz qyzmeti.
Almatyda Naýryzbaı aýdanynyń Aqjar (2-kezek) jáne Qaraǵaıly (1-kezek) shaǵyn aýdandarynda sý qubyry jáne káriz jelileriniń qurylysy aıaqtaldy.
Joba prokýratýra organdarynyń memleketke qaıtarǵan qarajat esebinen iske asyryldy.
Onyń aıasynda 43,7 km sý qubyry jáne 40,8 km káriz jelisi júrgizildi. Qazirgi ýaqytta nysandar paıdalanýǵa berildi.
— Jańa ınfraqurylym qalanyń taý bókterindegi aýdandarynyń 10 500 turǵynyn sapaly sýmen jabdyqtaý jáne sý burý qyzmetterimen qamtamasyz etýge múmkindik beredi. Atalǵan jobany iske asyrý áleýmettik mańyzdy máselelerdi sheshý jáne turǵyndardyń ómir súrý sapasyn jaqsartý úshin memleketke qaıtarylǵan qarajatty tıimdi paıdalanýdyń taǵy bir mysaly boldy, — delingen vedomstvo habarlamasynda.
Budan buryn qaıtarylǵan aktıvter esebinen óńirlerdegi 500 ınfraqurylymdyq jobaǵa 610 mlrd-tan astam teńge bólingeni belgili boldy.
