Almatyda memleket muqtajyna taǵy 32 jer telimi alynady

ALMATY. KAZINFORM — Almatyda jer telimderin memleket muqtajyna alý týraly birneshe qaýly shyqty. 

Jer telimderi avtomobıl parkiniń qurylysyna, avtobýs parkin keńeıtýge, aýmaqty abattandyrýǵa jáne mektep aýmaǵyn keńeıtýge májbúrli túrde alynady. Atap aıtqanda:

Almaty qalasy ákimdiginiń 2025 jyldyń 22 qazanyndaǵy qaýlysyna sáıkes, № 193 mektep aýmaǵyn keńeıtý úshin, «Kemel» shaǵyn aýdanynda ornalasqan 20 jer ýchaskesin memleket muqtajyna alynady. Májbúrlep ıelikten shyǵarý merzimi 2027 jyldyń 31 jeltoqsanyna deıin belgilendi. Jer telimderi satyp alynǵannan keıin qalalyq bilim basqarmasyna beriledi.

Qala ákimdiginiń ózge qaýlysy boıynsha aýmaqty abattandyrý úshin Medeý aýdany, Dostyq dańǵyly, 99E mekenjaıynda ornalasqan jer ýchaskesi memleket muqtajyna alynady. Ol satyp alynǵan soń, Medeý aýdany ákimdiginiń teńgerimine ótedi.

Odan bólek balalar oıyn alańyn uıymdastyrý úshin Naýryzbaı aýdany, Qyran kóshesi, 20 mekenjaıynda jer telimi májbúrli túrde alynady. Ol memleket menshigine ótkennen keıin Naýryzbaı aýdany ákiminiń teńgerimine beriledi.

Sondaı-aq Almaty qalasy ákimdiginiń 2025 jylǵy 22 qazandaǵy № 4/675-1293 qaýlysyna sáıkes, «Shuǵyla» shaǵyn aýdanynda ornalasqan 7 jer ýchaskesi avtomobıl parkiniń qurylysy úshin alynady. Májbúrlep ıelikten shyǵarý merzimi 2028 jyldyń 31 jeltoqsanyna deıin belgilendi.

Almaty qalasy ákimdiginiń 2025 jylǵy 22 qazandaǵy № 4/675-1294 qaýlysy boıynsha qoldanystaǵy avtobýs parkin keńeıtý úshin Rysqulov dańǵyly, 76 mekenjaıynda ornalasqan 3 jer telimi májbúrlep ıelikten shyǵarylady. Merzimi — 2027 jyldyń 31 jeltoqsanyna deıin belgilendi.

Atalǵan jer telimderi satyp alynǵannan keıin jol qozǵalysy jáne jolaýshylar kóligin uıymdastyrý basqarmasyna beriledi.

Eske salaıyq, buǵan deıin Almatyda kólik ınfraqurylymy úshin 18 jer telimi memleket menshigine alynatynyn jazǵanbyz.