Almatyda memleket qajettiligine 30-dan astam jer telimi alynady

ALMATY. KAZINFORM — Almatyda memleket muqtajy úshin jer ýchaskelerin alyp qoıý rásimin bastaý týraly qala ákimdiginiń qaýlysy shyqty. 

Almaty qalasy ákimdiginiń 2025 jylǵy 30 shildedegi № 3/470-1105 qaýlysy jáne Almaty qalasy ákimdiginiń 2025 jylǵy 30 shildedegi № 3/470-1106 qaýlysy «Almaty aqshamy» gazetinde jarııalanǵan.

Birinshi qaýly boıynsha Bostandyq aýdany, Jandosov kóshesiniń soltústiginde, Vahtangov kóshesiniń shyǵysynda ornalasqan 34 jer ýchaskesi aýmaqty abattandyrý jáne kógaldandyrý úshin memleket muqtajyna alynbaq. Májbúrlep ıelikten shyǵarý merzimi 2028 jyldyń 31 jeltoqsanyna deıin belgilengen. Jer telimderiniń menshik ıelerine Almaty qalasy jer qatynastary basqarmasy zańnamamen belgilengen tártipte ótemaqy tóleýdi qamtamasyz etedi. Ýchaskeler tolyq alynǵannan keıin Almaty qalasy Bostandyq aýdany ákiminiń apparatynyń teńgerimine beriledi.

Al ekinshi qaýlyda ortaq paıdalaný nysany, atap aıtqanda stadıon úshin Medeý aýdany, Qulja tas jolynyń ońtústiginde ornalasqan 2 jer ýchaskesi memleket muqtajy úshin alynatyny kórsetilgen. Májbúrlep ıelikten shyǵarý merzimi 2027 jyldyń 31 jeltoqsanyna deıin belgilengen. Munda da menshik ıelerine Almaty qalasy jer qatynastary basqarmasy ótemaqy tóleýdi qamtamasyz etedi, al alynǵan jer telimderi Almaty qalasynyń qurylys basqarmasyna beriledi.

Eske salaıyq, Almatyda jańa mekteptiń joly úshin 11 jer telimi májbúrli túrde alynatynyn jazǵanbyz.