Almatyda memleket bergen páterdi zańsyz paıdalanǵan 114 azamat úıden shyǵaryldy
ALMATY. KAZINFORM — Almatyda kommýnaldyq turǵyn úı qorynan jalǵa berilgen páterlerdiń maqsatty paıdalanylýy tekserilip jatyr.
Jyl basynan beri Kommýnaldyq ınfraqurylymdy damytý basqarmasy men Turǵyn úı ınspektsııasynyń mamandary Naýryzbaı, Alataý, Medeý jáne Túrksib aýdandaryndaǵy 3125 páterdi teksergen. Monıtorıng nátıjesinde turǵyn úıdi úshinshi tulǵalarǵa zańsyz bergen 172 jaǵdaı anyqtalyp, 114-inde páter bosatyldy. Qalǵan 58 jaǵdaı boıynsha sotqa deıingi talaptar joldanǵan.
— Tekserý kezinde turǵyn úıdi qosalqy jalǵa berý, jaldaý shartynda kórsetilmegen adamdardyń turýy jáne jaldaý aqysyn tóleý boıynsha mindettemelerdi oryndamaý sııaqty zań buzýshylyqtar anyqtaldy, — dep habarlady ákimdikten.
Bosatylǵan páterlerde jóndeý jáne qalpyna keltirý jumystary júrgizilip jatyr. Jumys aıaqtalǵan soń bul turǵyn úıler jalǵa beriletin baspanaǵa muqtaj retinde esepte turǵan áleýmettik osal sanattaǵy azamattarǵa beriledi.
Qala ákimdigi jalǵa beriletin turǵyn úıdi úshinshi tulǵalarǵa berý jaldaý shartyn buzýǵa negiz bolatynyn atap ótti. «Turǵyn úı qatynastary týraly» QR Zańynyń 24-baby 3-tarmaǵyna sáıkes, memleket tarapynan berilgen turǵyn úıdi azamat ózge adamǵa jalǵa berýge jáne ýaqytsha turǵyndardy turǵyzýǵa quqyly emes.
Eske salaıyq, elimizde turǵyn úı kezegindegilerdi pátermen qamtý qarqyny qalaı ekenin jazǵanbyz.
