Almatyda membaǵdarlamamen alynǵan 160 páter úshinshi tulǵalarǵa jalǵa berilgen
ALMATY. KAZINFORM – Almatyda satyp alý quqyǵynsyz memlekettik baǵdarlama boıynsha jaldamaly páter alǵan adamdar kelisimshart merzimi aıaqtalǵannan keıin de páterlerdi bosatýdan bas tartyp otyr.
Bul týraly Óńirlik kommýnıkatsııalar qyzmetiniń alańynda Almaty ákiminiń orynbasary Almashan Smatlaev aıtty. Onyń sózinshe, baǵdarlamanyń 2019 jyldan bastap júzege asyrylyp keledi jáne ol jumys isteıtin jastardy qoldaýǵa baǵyttalǵan. Baǵdarlamanyń maqsaty — jastarǵa jeńildetilgen sharttarmen qoljetimdi jaldamaly turǵyn úı usynyp, keıin óz baspanasyn satyp alý úshin bastapqy jarnany jınaýǵa múmkindik berý.
Almashan Smatlaev 2019–2024 jyldary qala jastaryna 4581 jaldamaly páter berilgenin atap ótti. 2025 jyly 1050 páter boıynsha kelisimshart merzimi aıaqtalǵan.
— Shart boıynsha jaldamaly turǵyn úı 3 jyldan 5 jylǵa deıingi merzimge, ýaqytsha qoldaý retinde berildi. Al ony alǵan adamdarǵa keıin óz baspanasyn satyp alý úshin qarajat jınaý maqsatynda ıpotekalyq jáne turǵyn úı baǵdarlamalaryna qatysý mindetteldi. Shartqa qol qoıý kezinde jalǵa alýshylarǵa turǵyn úıdiń ýaqytsha beriletini jáne merzimi aıaqtalǵan kezde páterdi zańda belgilengen tártippen bosatýǵa mindetti ekeni túsindirilgen. Alaıda keıbir adamdar bastapqy jarnany jınaı almaǵan nemese qoljetimdi turǵyn úı baǵdarlamalaryn paıdalanbaǵan, — dedi qala ákiminiń orynbasary.
Odan bólek Almashan Smatlaevtyń aıtýynsha, jaldamaly páterlerdi tekserý barysynda birqatar zańbuzýshylyqtar anyqtalǵan. Keı adamdar ózderine berilgen páterlerdi úshinshi tulǵalarǵa zańsyz jalǵa bergen. 2025 jyly mundaı 160 jaǵdaı tirkeldi. Onyń ishinde qazir 145 páter bosatylsa, 15-i boıynsha sot júrip jatyr.
Sondaı-aq búgingi kúni jalǵa berý merzimi aıaqtalǵan 1050 jaldamaly páterdiń 820-sy óz erkimen bosatylǵan. Qalǵan 230 páter boıynsha turǵyndar shart talaptaryn oryndaýdan bas tartqandyqtan, sot otyrystary ótip jatyr.
Eske salaıyq, buǵan deıin 14 myńnan astam áleýmettik az qamtylǵan azamat jaldamaly páterge ıe bolatynyn jazǵanbyz.