Almatyda mektepten aqsha jymqyrǵan býhgalter 7 jylǵa sottaldy

ALMATY. KAZINFORM - Almaty qalasy Medeý aýdanynyń №2 aýdandyq soty senip tapsyrylǵan bóten múlikti ıemdenip alý nemese talan-tarajǵa salý boıynsha mektep býhgalterine qatysty qylmystyq isti qarady.

2019-2023 jyldar aralyǵynda Almaty qalasyndaǵy gımnazııalardyń biriniń bas esepshisi N. oqý ornynyń banktik shottaryna qol jetkize otyryp «Internet-bankıng» elektrondy júıesi arqyly óziniń jeke shotyna, sondaı-aq, basqa tulǵanyń shottaryna aqshalaı qarajatty negizsiz aýdaryp otyrǵan. Keltirilgen materıaldyq shyǵynnyń jalpy somasy – 23 mıllıon teńge.

Sotta sottalýshy N. óz kinásin tolyq moıyndap, oǵan bas bostandyǵynan aıyrmaıtyn jaza taǵaıyndaýdy surady. Prokýror sottalýshyny 7 jyl 6 aıǵa bas bostandyǵynan aıyrýdy surady. Sot sottalýshy N.-ny kináli dep tanyp, óz kinásin moıyndaýynyń, kýágerlerdiń aıǵaqtarynyń, mamannyń qorytyndysynyń negizinde ony 7 jylǵa bas bostandyǵynan aıyrdy.

«Jaza taǵaıyndaý kezinde sot N.-ǵa jaýapkershilikti jeńildetetin mán-jaılar retinde: jasaǵan qylmysyna ókinýin, materıaldyq zalaldy jartylaı túrde ótegendigin, jas balasynyń bolýyn eskerdi. Іs boıynsha jazany aýyrlatatyn mán-jaılar anyqtalmady», - dep habarlady qalalyq sottan.

Úkim zańdy kúshine engen joq.

Eske salaıyq, buǵan deıin Almatyda 114 mln teńgege jalǵan brendtik kıimderdi satqan adam sottalǵanyn jazǵanbyz.