Almatyda mekteptegi tamaq sapasyn baqylaıtyn komıssııa qurylady
ALMATY. KAZINFORM - Almatyda mektep ashanalarynda tamaqtaný sapasyn baqylaýdy kúsheıtý úshin monıtorıngtik komıssııa qurylady. Bul týraly Almaty ákiminiń orynbasary Ásem Núsipova mektepte tamaqtandyrýdy uıymdastyrý jónindegi keńes barysynda habarlady.
Komıssııa jumysyn qalalyq mektepterde tamaqtaný sapasyn baqylaý úshin qala ákiminiń ókimi boıynsha qurylǵan vedomstvoaralyq saraptama toby oryndaıtyn bolady. Onyń quramyna qala basshysynyń orynbasary, máslıhat depýtattary, qoǵamdyq keńes músheleri, qalanyń sanıtarlyq-epıdemıologııalyq baqylaý ókilderi, medıtsına qyzmetkerleri, mektep ákimshiligi jáne ata-analar qoǵamynyń ókilderi kiredi. Komıssııanyń aralyq qorytyndylary 15 qyrkúıekke deıin, jalpy qorytyndylary – osy jyldyń 25 qyrkúıegine deıin shyǵarylady.
«Bıylǵy oqý jylynda mektep ashanalarynda jańa mázir ázirlendi, oǵan sáıkes oqýshylardyń tamaqtanýy baqylanady. Sondaı-aq, oqýshylardyń tamaqtanýyna qaýipsiz jaǵdaı jasaý úshin barlyq taraptardyń belsendi ózara is-qımyly qajet. Aıta ketý kerek, bul komıssııa balalarymyzdyń qaýipsizdigin qamtamasyz etý maqsatynda tamaqtaný monıtorıngine baǵyttalǵan», - dedi Ásem Núsipova.
Sonymen qatar qalalyq sanıtarııalyq-epıdemıologııalyq baqylaý departamentiniń basshysy Qasymhan Alpysbaıuly jospardan tys tekserýlerdiń nátıjelerin aıtty.
«Almatyda 328 mektep baqylaýǵa alynǵan, onyń ishinde 322-sinde ystyq tamaq uıymdastyrylǵan, qalǵandarynda býfet júıesi jumys isteıdi. 215 memlekettik mekteptegi ashanalar jeke kásipkerlerge jalǵa berildi. Búgingi tańda bilim basqarmasynyń málimetinshe, 54 mekteptiń ashanalaryn jalǵa alýshylar aýystyryldy. Aıta ketý kerek, jalǵa alýshylar obektiniń sanıtarııalyq qaǵıdalar talaptaryna sáıkestigi týraly sanıtarııalyq-epıdemıologııalyq qorytyndyny ýaqtyly alýy tıis», - dep atap ótti Alpysbaıuly Qasymhan.
Almatyda barlyǵy 133 myńnan astam bilim alýshy nemese orta bilim berý uıymdarynyń 45,3%-y tegin tamaqpen qamtamasyz etilgen. Bul - halyqtyń áleýmettik osal toptarynyń 1-4 jáne 5-11 synyp oqýshylary.
Eske salaıyq, buǵan deıin «Almaty jastaryna» ótinim bergen 2 myńǵa jýyq jas baspanaly bolǵanyn jazǵanbyz.
