Almatyda mekteptegi lańkestik týraly jazba qaldyrǵan 8-synyp oqýshysy ustaldy
ALMATY. KAZINFORM – Almatyda jasóspirim mektepke qatysty lańkestik sıpattaǵy jazba qaldyrǵan.
Áleýmettik jelidegi belgisiz akkaýntta qarý beınesimen qatar mektepterge qatysty zorlyq-zombylyqqa shaqyratyn jazba jarııalanǵan.
Almaty qalasy polıtsııa departamentiniń málimetinshe, jedel izdestirý sharalar kezinde Naýryzbaı aýdanyndaǵy №207 mekteptiń 8-synyp oqýshysy anyqtalyp, jasóspirim polıtsııaǵa jetkizilgen. Onymen áreketiniń saldary men zańdyq jaýapkershiligi jóninde profılaktıkalyq túsindirý jumystary júrgizilgen.
Sonymen qatar kámeletke tolmaǵan balanyń ata-anasy óz mindetterin tıisinshe oryndamaǵany úshin jaýapqa tartyldy.
- Polıtsııanyń ustanymy aıqyn, kez kelgen qaýipti jazba dereý jáne qatań túrde toqtatylady. Bul - jaı oıyn nemese eskertý emes. Mundaı aqparat qoǵamda alańdaýshylyq týdyryp, jedel qyzmetterdiń resýrsyn buryp, qaýipsizdikke qater tóndirýi múmkin. Jaýapty tulǵalar jasy men ýájine qaramastan anyqtalyp, zań boıynsha jaýapkershilikke tartylady. Biz ata-analardy balalardyń minez-qulqyn, ınternettegi áreketterin jáne áleýmettik ortasyn qadaǵalaýǵa erekshe mán berýge shaqyramyz, – dedi Almaty qalasy PD jergilikti polıtsııa qyzmeti basqarma bastyǵynyń orynbasary Tımýr Noǵaıbaev.
Eske salaıyq, buǵan deıin Almatydaǵy oıyn-saýyq ortalyqtarynyń birinen adamdar evakýatsııalandy.