Almatyda mektep janyndaǵy lagerlerge 300 mln teńge bólindi
ALMATY. KAZINFORM – Almaty qalasy Bilim basqarmasynyń uıymdastyrýmen qalalyq mektepterdiń janynan ashylǵan jazǵy demalys oryndaryna baspasóz týry uıymdastyryldy. Іs-shara barysynda bastaýysh synyp oqýshylaryna arnalǵan lagerlerdiń jaı-kúıi kórsetildi.
Almaty qalasy Bilim basqarmasynyń basshysy Lázzat Jylqybaeva aıtýynsha, megapolıs mektepterinde 191 lager uıymdastyrylǵan jáne balalar bir rettik ystyq tamaqpen qamtamasyz etilgen.
– Jalpy Almaty qalasynda 215 memlekettik mektep bar, onyń 191-inde mektep janyndaǵy jazǵy lager uıymdastyryldy. Ekinshi jyl qatarynan balalar bir rettik ystyq tamaqpen qamtamasyz etildi. Eger bul maqsatqa byltyr 260 mln bólinse, bıyl jergilikti bıýdjetten 300 mln qarjy bólindi. Qaladaǵy jazǵy demalys oryndarynyń ekeýinde etnolager uıymdastyryldy. Odan bólek, 8 aýdannyń 8 mektebinde sporttyq lagerler ashyldy. Sondaı-aq megapolıste ornalasqan 20 memlekettik kolledjdiń 12-sinde kásipke baǵyttaıtyn lagerler quryldy. Jalpy qaladaǵy 191 lagerde bastaýysh synypta oqıtyn 40 myń bala qatysyp júr, - dedi Lázzat Jylqybaeva.
Basqarma basshysy byltyr Alataý jáne Naýryz aýdandarynda ashylǵan Oqýshylardyń shyǵarmashylyq ortalyqtarynda 3 aı boıy qosymsha úıirmeler men sektsııalar jumys isteıtinin atap ótti. Sondaı-aq Oqýshylar saraıyna qaraıtyn “Órnek” lageri 3 aı boıy oqýshylardy qabyldaıtyn bolady.
Lázzat Jylqybaevanyń aıtýynsha, qosymsha bilim berý oryndary saǵat 9:00-den 15:00-ge deıin 2 apta jumys isteıdi. Al qala syrtyndaǵy demalys oryndary óz jumysyn 1 shilde kúni bastaıdy.
– Bıyl jazǵy demalysqa 266 myń almatylyq bala qamtylady. Oqýshylar lagerlerde shyǵarmashylyqpen, sportpen ǵana aınalysyp qoımaı, sondaı-aq kásibı qasıetterin damytady, bolashaq mamandyqtaryna beıimdele bastaıdy. Sonymen qatar, Oqýshylar saraıyndaǵy «Órnek» lageri 3 aıda 900 balany qabyldaıdy dep josparlap otyrmyz. Oǵan jetim balalar, HÁOT sanatyndaǵy balalar jáne ártúrli jarystardyń jeńimpazdary qatysady, - dedi Almaty qalasy ákiminiń orynbasary Ásem Núsipova.
