Almatyda mektep oqýshylary arasynda halyqaralyq shahmat týrnıri bastalady
ASTANA.KAZINFORM — 2026 jylǵy 7-10 sáýir aralyǵynda Almaty qalasynda mektep oqýshylary arasynda World Schools Team Championship 2026 halyqaralyq komandalyq týrnıriniń Azııa kezeńi ótedi.
Bul týrnır Halyqaralyq shahmat federatsııasy FIDE jáne Mektep shahmatynyń halyqaralyq federatsııasy bastamasymen alǵash ret osyndaı formatta uıymdastyrylyp otyr jáne jahandyq jarystar tsıklin bastaıdy.
Jarysqa 19 elden 26 mektep komandasy qatysady. Olardyń qatarynda Avstralııa, Úndistan, Qytaı, Qazaqstan, Qyrǵyzstan, Malaızııa, Mońǵolııa, Jańa Zelandııa, Pákistan, Sıngapýr, Ózbekstan jáne basqa da elder bar. Sondaı-aq Bangladesh, Qytaıdyń Gonkong arnaıy ákimshilik aýdany, Nepal, Reseı, Tájikstan, Túrikmenstan, Fılıppın jáne Shrı Lanka elderiniń komandalary qatysady. Barlyq qatysýshylar- 8-14 jas aralyǵyndaǵy jalpy bilim beretin mektep oqýshylary.
Týrnır formaty boıynsha ár komanda 4 negizgi oıynshydan jáne 1 qosalqy oıynshydan quralady. Jarysqa tek mektep komandalary qatysady. Shahmat akademııalary, klýbtar jáne birneshe mektepten quralǵan quramalar jiberilmeıdi.
Qazaqstan atynan týrnırge 3 komanda qatysady. Ulttyq irikteý 14-15 naýryz kúnderi Astana qalasynda ótip, oǵan elimizdiń 23 úzdik mektep komandasy qatysty. Jeńimpazdar men júldegerler halyqaralyq kezeńge joldama aldy.
Týrnır 8 týrdan turatyn shveıtsar júıesi boıynsha ótedi. Kún saıyn 2 týr oınalady. Ár partııaǵa 45 mınýt beriledi jáne ár júriske 10 sekýnd qosylady. Jeńis úshin komandaǵa 2 upaı, teń oıyn úshin 1 upaı beriledi.
Atalǵan Azııa kezeńi halyqaralyq jarystar tsıklin bastaıdy. Onyń qorytyndysy boıynsha úzdik mektep komandalary fınalda kezdesip, álem chempıony ataǵyn sarapqa salady. Jyl boıy irikteý kezeńderi Afrıka, Amerıka jáne Eýropa qurlyqtarynda ótedi. Qurlyqtyq kezeńderdiń jeńimpazdary jeltoqsan aıynda grand fınalda kezdesedi. Almaty osy halyqaralyq tsıkldi ashatyn alań bolady.
Aıta ketelik Qazaqstandyq shahmatshylar jasóspirimder arasyndaǵy chempıonatta bes altyn medal jeńip alǵan edi.
